Балаҕан ыйын 8 күнүгэр Мииринэй улууһугар көтөн тиийээт, Саха өрөспүүбүлүкэтин баһылыга Айсен Николаев Удачнай куорат “Полярнай” аэропордун көтөр балаһатын туругун көрдө.
Санатан эттэххэ, Удачнай аэропорда магистральнай инфраструктураны саҥардыы уонна кэҥэтии кэлим былааныгар киирбитэ, онон федеральнай бүддьүөттэн үбүлэнэр.
2022 сыл олунньутуттан 2024 сыл алтынньытыгар диэри “Полярнай” аэропорд саҥардыытын маҥнайгы түһүмэҕэ былааннаммыта. Бу түһүмэх иһигэр аэропорт көтөр-түһэр балаһатын, сырдыгынан сигналлыыр тэриллэрин, уотунан-күөһүнэн хааччыйар тиэхиньикэтин өрөмүөннээһин күүтүллэр. Бу үлэлэргэ федеральнай бүддьүөттэн 2,8 млрд солкуобай кэриҥэ үбүлээһин ыытыллыаҕа.
Билиҥҥи туругунан аэропорт тырааныспарын систиэмэтэ доруобуйаларынан хааччахтаах дьону тиэйии ирдэбилигэр сөп түбэспэт, онон аэропорт маннык кыһалҕалаахтарга көмөлөһөр тэриллэрэ саҥардыллыахтаахтар. Эбии саҥа суолу уонна 1985 сыллаахха тутуллубут хочуолунай оннугар саҥаны тутуу былааннаналлар.
«Полярнай» аэропорт 40 сылтан ордук дьону, малы-салы, таһаҕаһы, аһы-үөлү тиэйэр, алмааһы хостуур бырамыысылыннас кыһалҕаларын хааччыйар.
Эбийиэк мэдиссиинэ уонна социальнай эйгэҕэ суһал көмөнү оҥорууга сүдү оруоллаах. Бу аэропортан быыстала суох Москва, Красноярскай, Новосибирскай, Иркутскай, Мииринэй, Дьокуускай хайысхаларнан сөмөлүөттэр көтөллөр.
Хаартыска: sakha.gov.ru