Саха сирин Ил Дархана Айсен Николаев бэс ыйын 5 күнүн киэһэтигэр бэйэтин инстаграм страницатыгар #ПМЭФ2021 хэштегтаах Санкт-Петербурга ааспыт норуоттар икки ардыларынааҕы экэниэмикэ пуорумун түмүктүүр сонуннарын таһаарбыт.
Пуорум сүрүн түмүктэрин маннык суруйбут:
-
С.О.Макаров адмирал аатынан муора уонна өрүс флотун судаарыстыбыннай университетыгар тиийэ сырыттым. Университет ректорын Сергей Олегович Барышниковтыын биһиги пуортарбытыгар, флотпутугар, тутулла турар хараабыл өрөмүөннүүр собуотугар үлэлиэхтээх каадырдары бэлэмнээһин хайысхатыгар сөбүлэҥ түһэристибит.
-
“Хоту территориялары уонна олохтоох норуоттары сайыннарыы” мунньахха спикер буоллум. Федеральнай былаас салайааччыларын, Финляндия, Канада посолларын, хоту эрэгийиэн салайааччыларын, эспиэрдэрин кытта олох хаачыстыбатын тупсарыы, төрүт норуоттары сайыннарыы сүрүн хайысхаларын ырыттыбыт.
-
Ыччат дьыалатынан дьарыктанар федеральнай ааҕыныстыба салайааччытын Ксения Разуваеваны @rosmolodez кытта бииргэ үлэлэһии туһунан сөбүлэҥ түһэристибит. Биһиги ситиһиэхтээх сорудахтарбыт – үөрэҕирии сайдыытын көҕүлээһин, дьоҕурдаах, айар талааннаах ыччаты өйөөһүн, ыччат саталын арыйыыга көмө.
-
«Марубени Корпорейшн» хампаанньа СНГ иһинээҕи эрэгийиэннээҕи генеральнай дириэктэрин Наотака Минэдзаки тойону кытта көрүстүм.
-
АО «РИК Плюс» уонна ГК «Старвей» хампаанньалары кытта үс өрүттээх инвестиционнай сөбүлэһиигэ илии баттааһын буолан ааста. Бу сөбүлэһии сүрүн сыала – тутуу маһынан дьарыктанар ЛПК «Алмас» @ooo_almas тэрилтэ нөҥүө өрөспүүбүлүкэҕэ тутуу маһы оҥорор урбаан салаатын сайыннарыы.
-
Өрөспүүбүлүкэ бырабыыталыстыбатын кытта ойуур баһаардарын туһунан ыкса билсэ сылдьабын. Мин дьаһалбынан Саха сирин бырабыыталыстыбатын бэрэссэдээтэлин маҥнайгы солбуйааччыта Дмитрий Садовников @sadovnikovdd Ньурба улууһугар тиийбит. Хабаровскайтан БЕ-200 сөмөлүөт тиийдэ. Ону таһынан Хабаровскай уонна Приморье кыраайдарыттан парашюттаах десант үлэһиттэрэ тиийэллэрэ көһүтүллэр.
Тыҥааһыннаах үлэ күннэрэ салгыы бара тураллар!
https://www.instagram.com/p/CPvvpCZpeyw/?utm_medium=copy_link
«Саха сирэ» хаһыат, edersaas.ru
Хаартыска Айсен Николаев инстаграмыттан