Ил Дархан: ОРВИ уонна кириип утары быһыылар тустарынан

Үгэс курдук,маҥнай, улуустар бүгүҥҥү балаһыанньаларын билистэ, баһылыктарга саҥа соруктары туруорда. ОРВИ уонна кириип дьаҥнарын утары оҥоһуллар быһыы иккис түһүмэҕэр, сыл бүтүөр диэри өрөспүүбүлүкэ нэһилиэнньэтин 60%-на  быһыыны ылбыт буолуохтааҕа этилиннэ. Маныаха, бүтэһик хонукка хоруона хамсыгар өрөспүүбүлүкэ үрдүнэн 198 киһи ыалдьыбытын, итинтэн Дьокуускайга 96 киһи олорорун, 102 дьаҥнааччы 26 оройуоҥҥа бэлиэтэммитин ыйда.

Айсен Сергеевич ыараханнык дьаҥнаан сытааччылар ахсааннарыттан долгуйарын биллэрдэ уонна Доруобуйа харыстабылын министиэристибэтигэр улуустар киин балыыһаларыгар сүбэни-аманы, методическай көмөнү тиһиктээхтик оҥороллоругар соруйда. Бүгүҥҥү күҥҥэ реанимацияҕа сытар 104 киһиттэн, сүүрбэ киһи туруга мөлтөҕө, ИВЛ аппараатыгар холбонон сыталлара этилиннэ. Ыарахан туруктаах пациеннар үксүлэрэ Дьокуускай куоракка сыталлар. Улуустарга Алдан уустук балаһыанньалаах, онно 14 киһи улаханнык ыалдьан сытар. Итинник туруктаах пациеннар Бүлүүгэ, Ленскэйгэ, Горнайга, Мэҥэ Хаҥаласка, Мииринэйгэ, Намҥа, Нерюнгригэ, Өлөүхүмэҕэ, Тааттаҕа бэлиэтэнэллэр.

Өрөспүүбүлүкэ баһылыга оройуоннар икки ардыларыгар сырыыны, суолларга баар кафелары, айан дьоно тохтоон ааһар дьиэлэригэр хонтуруолу тэрийэргэ соруйда. Бу ордук  кыһыҥҥы суол-иис аһыллыбытын кэнниттэн, инфекцияҕа сыстыы куттала үрдээбит, сылы эргиччи суола-ииһэ суох Арктическай оройуоннарга, сэлиэнньэлэргэ туһаайылынна. Оройуоннар атыылаһаннар, ИФА уонна ИХА ньыматынан экспресс-тестэри, тиийбит дьон булгуччу туттаран иһиэхтээхтэрэ бэлиэтэннэ. Ол эрээри, бүгүҥҥү күҥҥэ диэри Верхоянскай, Бүлүү, Ленскэй, Муома, Нам, Аллараа Халыма, Өлүөхүмэ, Сунтаар, Таатта уонна Томпо оройуоннара ылбакка олороллоро билиннэ.

Саҥа дьыл бырааһынньыктара чугаһаабыттарынан, улуус баһылыктара тыа сиригэр дьонноругар-сэргэлэригэр сынньана тиийэр оҕолорго хонтуруолу улаатыннаралларыгар этилиннэ. Маны сэргэ, Ил Дархан Саҥа дьыл бырааһынньыгар ирдэбиллэр тутуһуллуохтаахтарын санатта.

ОРВИ уонна кириип утары быһыылары оҥоруу сотору түмүктэнэрэ былааннанар. Маныаха сорох оройуоннарга көрдөрүү намыһаҕын кини эттэ. Ол курдук, Томпо, Уус Маайа, Эбээн Бытантай оройуоннара уонна Дьокуускай куорат көрдөрүүлэрэ кыра. Бу тымныйан ыалдьыы аныгыскы долгунугар охсуулаах буолан тахсыан сөбө бэлиэтэнэр.

«ОРВИ уонна кириип утары быһыы, хоруона хамсыгын утары охсуһарга көмөлөһүө. Маныаха олунньу-кулун тутар ыйдарга турар тымныйан ыалдьыы, ити кэмнэргэ сибикилиир хоруона хамсыгын долгунун кытары тэҥҥэ кэлиэн сөп. Дьаҥнааһын күһүҥҥүтээҕэр саас элбэх буолар«, — диэтэ кини.