Ил Дархан олоххо-дьаһахха уонна экэниэмикэҕэ туруктаах буолууну хааччыйар туһуттан бары миэрэлэри ылынарга сорудахтаата
Саха сирин баһылыга Айсен Николаев бүгүн, олунньу 28 күнүгэр, бырабыыталыстыба салалтатын уонна Ил Дархан уонна бырабыыталыстыба дьаһалтатын кытта сүбэ мунньахха Арҕаа дойдулар санкцияларын кэмигэр эрэгийиэҥҥэ социальнай уонна экэниэмикэ өттүнэн туруктаах буолар туһугар сөптөөх миэрэлэри ылынар суолталааҕын иһитиннэрдэ.
“Бүгүн биһиги бэлиитикэ өттүнэн олоччу атын быһыыга-майгыга олоробут. Дойдубутугар арҕааҥҥы уонна Европа дойдуларыттан күүстээх ыгыы барар, кытаанах хааччахтыыр миэрэлэр киллэрилиннилэр. Биһиги манныкка бэлэм буолуохтаахпыт уонна биһиги сорукпутунан Саха сиригэр арҕааҥҥы хааччахтааһыннар усулуобуйаларыгар олох-дьаһах уонна экэниэмикэ туруктаах буолуутун хааччыйар сорук турар. Билигин биһиги бары бэрэсидьиэммитин, Украинаҕа денацификацияҕа уонна демилитаризацияҕа анал дьайыыны ыытар аармыйабытын өйүөхтээхпит. Бу боппуруос ситиһиилээхтик быһаарыллыа диэн эрэнэбин”, — диэтэ эрэгиийэн баһылыга.
Өрөспүүбүлүкэ баһылыга дойду бэрэсидьиэнэ бу кыһалҕаны быһаарыыга үгүһү оҥорорун бэлиэтээтэ.
“Дьиҥэ, биһиги дойдубутугар биир эрэ туруорсуу баара – Украина НАТО дойдуларын кэрискэтигэр киирбэккэ, кимиэхэ да сыстыбат дойдунан буоларыгар. Ол эрээри, Украинаҕа фашистар аһаҕас идеологиялара баһылыыр идеологиянан буолар кэмигэр биһиги Кыайыы туһугар аан дойдуга элбэҕи сүтэрбит, XX үйэҕэ фашизмы урусхаллаары уонунан мөлүйүөн киһи толук буолбут дойдута, ыаллыы дойдубут фашист дойдута буола кубулуйарыгар баҕарбаппыт”, — диэн өрөспүүбүлүкэ баһылыга бэлиэтээтэ.
Ил Дархан уонна Бырабыыталыстыба дьаһалтатын пресс-сулууспата
Бэлэмнээтэ Женни Стрюкова