Айылҕа харыстабыла Сүрүн

Ил Дархан: Ойуур баһаарын умулларыы түргэтээтэ

“Быйыл ойуур баһаарын умулларыыга үлэни-хамнаһы күүһүрдэн, федеральнай киини кытары күүскэ үлэлэспиппит түмүгэр хас да тыһыынча гектары уоттан быыһаатыбыт”, – диэн бэлиэтээтэ Ил Дархан Айсен Николаев бүгүн “Саха” НКИХ биэриитигэр.

Билигин өрөспүүбүлүкэ үрдүнэн барыта 100-тэн тахса сиргэ ойуур баһаара бара турар. Баһаар саҕаланыаҕыттан 280 тыһыынча гектардаах сир умайда. Айсен Сергеевич ойуур баһаарын умулларыы туһунан этэригэр быйыл көдьүүстээх үлэ барбытын бэлиэтээтэ.

Өскөтүн былырыын баччаларга биир мөлүйүөнтэн тахса гектар иэннээх ойуурбутун уокка былдьаппыт буоллахпытына, быйыл ойуур баһаарын умулларыы үлэтэ түөрт төгүл көдьүүстээх буолла диэн этиэм этэ. Баһаар быһаарыныыны түргэнник ылынары эрэйэр, онон быйыл ойуур баһаарын умулларыыга үлэни-хамнаһы уларытан, күүһүрдэн, түргэтитэн биэрдибит. Ол түмүгэр үгүс сирбитин уоттан быыһаатыбыт, – диэн этэр Айсен Николаев.

Санатан эттэххэ, ойуур баһаардарынан сибээстээн билигин өрөспүүбүлүкэҕэ ыксаллаах быһыы-майгы биллэриллэн турар. Өрөспүүбүлүкэ баһаарынайдарын, ойуур хаһаайыстыбатын үлэһиттэрин таһынан билигин Ыксаллаах быһыы-майгы министиэристибэтин нөҥүө исписэлиистэр кэлэн үлэлии сылдьаллар.

Нэһилиэнньэлээх пууннарга билиҥҥитэ биир көстөөх сирдэринэн баһаардар бааллар эрээри, нэһилиэнньэҕэ кутталы үөскэппэттэр. Ол эрээри итинник диэн уоскуйан хаалыа суохтаахпыт. Ол иһин өрөспүүбүлүкэтээҕи ыксаллаах быһыы-майгы биллэрбиппит. Ити бииринэн федеральнай көмөнү ыларбытыгар да тирэх буолар. Иккиһинэн, федеральнай резервэттэн исписэлиистэри, анал техникалары аҕаларбытыгар төһүү буолар, – диэн бэлиэтиир Ил Дархан Айсен Николаев.

Аграфена КУЗЬМИНА, “Саха сирэ” хаһыат

0
0