Ил Дархан оройуоннарга коронавируһу бохсууга тутуһуллуохтаах миэрэлэри бэлиэтээтэ

17.11.2020
Бөлөххө киир:

Саха сиригэр уустук санитарнай-эпидемилогическай балаһыанньа салҕанар. Ааспыт нэдиэлэҕэ өрөспүүбүлүкэ үрдүнэн ыарыы 17,4 % элбээбит, оттон Дьокуускайга — 21,6 %. Бу туһунан бүгүн, сэтинньи 17 күнүгэр, Ил Дархан Айсен Николаев муниципальнай тэриллиилэр уонна куораттааҕы уокуруктар баһылыктарын кытта мунньахтаата.

Алдан, Горнай, Ленскэй, Мииринэй, Нам, Өймөкөөн, Өлүөхүмэ, Хаҥалас оройуоннааҕы уонна Дьокуускай балыыһаларын реанимационнай салааларыгар барыта 125 ыарыһах баар, онтон 29-һа ИВЛ-аппараакка холбонон сытар.

Ил Дархан санитарнай-эпидемиологическай балаһыанньаны учуоттаан туран, бүгүҥҥү күҥҥэ ыарахан туруктаах ыарыһах уонна өлүү ахсаанын аччатыы сүрүн сорук буоларын эттэ. Оройуон баһылыктарын сүрүн соруктарынан стационарга үлэлиир наадалаах усулуобуйаларын тэрийии буолар. Муниципальнай тэриллиилэр баһылыктара сүрүн быраастары кытта өрүү сибээскэ бааллар.

«Оройуоннарга хааччахтааһын миэрэлэрин тутуспат буолууттан ыарыы ахсаана элбиир. Санитарнай-эпидемиологическай ирдэбиллэри хонтуруоллааһын бэйэни салайыныы уорганнарын эппиэтинэстэригэр баар», — диэн Ил Дархан бэлиэтээтэ.

Атын соруктары кытта биир суолталаах соругунан «Сахафармация» тэрилтэ нөҥүө муниципальнай уонна чааһынай аптекалары эминэн хааччыйыы буолар. Тырааныспар министиэристибэтигэр уонна авиахампаанньаларга өрөспүүбүлүкэ бары улуустарыгар «күөх коридору» тэрийэргэ сордахтанна.

Айсен Николаев халлаан суолунан бастакы уочаратынан кириип утары вакцина улуустарга тиийиэҕин эттэ. Бу кэнниттэн ахсынньы 1 күнүгэр диэри нэһилиэнньэни вакцинациялааһын үлэтин бүтэрэргэ былаан турар. Боппуруоһу оройуон баһылыктара хонтуруоллууллар.

Өрөспүүбүлүкэ вице-премьерэ Ольга Балабкина 65-тэн үөһэ саастаах уонна дьарҕа ыарыылаах дьон хааччахтааһыҥҥа олороллорунан сибээстээн, волонтердар үлэлэрин күүһүрдэргэ диэн бэлиэтээтэ. Итиэннэ кини оройуон баһылыктара санитарнай-эпидемиологическай ирдэбиллэри тутуһууга анаан үөрэммэтэх волонтердары үлэҕэ кыттыһыннарбаттарын туһугар эттэ.

Оттон Роспотребнадзор Саха сиринээҕи управлениетын салайааччы Маргарита Игнатьева баһылыктар РФ сүрүн санитарнай бырааһын сэтинньи 13 күнүнээҕи уурааҕар болҕомтолорун ууралларыгар туһаайда. Манна анаалыһы ылыы бэрээдэгин уонна түмүгүн тиэрдии тула кэккэ уларыйыылар киирбиттэрэ.

Салгыы мунньахха Аллайыаха, Амма, Анаабыр, Өймөкөөн улуустарын баһылыктара коронавируһу бохсууга туох миэрэлэр ылыллалларын туһунан дакылааттаатылар. Кинилэр этэллэринэн, тэрилтэлэргэ уонна уопсастыбаннай сирдэргэ дезинфекциялааһыны күүһүрдүбүттэр, нэһилиэнньэҕэ өйдөтөр үлэ ыытыллар.

Ил Дархан уонна Бырабыыталыстыба пресс-сулууспата.

Андрей Сорокин хаартыската.

+1
0
+1
0
+1
0
+1
0
+1
0
+1
0
+1
0