Сүрүн Уопсастыба

Ил Дархан тулаайах оҕолорго бэлэх туттарда

Өрөспүүбүлүкэ Аҕа баһылыга Айсен Николаев ахсынньы 30 күнүгэр Мохсоҕоллоохтооҕу тулаайах уонна төрөппүт көрүүтэ-истиитэ суох хаалбыт оҕолорго көмөлөһөр кииҥҥэ сылдьан, Саҥа дьыллааҕы минньигэс бэлэхтэри туттарда.

Ону тэҥэ, Уһук Илин эрэгийиэн боломуочуйалаах бэрэстэбиитэлэ Юрия Трутнев тэрийбит сэбиэтин “Елка добра” аахсыйатын чэрчитинэн, 10 саастаах Влад Старков баҕа санаатын толорон, бэлэсипиэт бэлэхтээтэ.

Влад кыра эрдэҕиттэн кыайан хаампат этэ, кииҥҥэ киириэҕиттэн утумнаахтык дьарыктанан, билигин хаамар, сүүрэр кыахтаммыта. Кырачаан уолчааҥҥа туһугар бу хорсун быһыы буолар. Кини бэлэсипиэттэниэн, оҕолордуун тэҥҥэ сүүрүөн-көтүөн, оонньуон олус баҕарара. «Елка добра» аахсыйа кэмигэр кини суругар бэлэсипиэт туһунан суруйбута. Саҥа дьыл алыптаах күннэригэр бүччүм баҕа санаа туолар айылгылаах… Уолчаан олус үөрдэ, дьоллонно!

— Мин бүгүн сарсыардаттан Тымныы Моруос сорудаҕын толоробун… Влад Старков суругун тутан баран, бүгүн бэлэҕи туттардым. Влад — талааннаах, өйдөөх уолчаан, үчүгэйдик үөрэнэр уонна ыллыырын сөбүлүүр. «Инникигэ хардыы» кэмпириэнсийэҕэ дипломант буолбута. Оҕолор дьолломмут, үөрбүт сирэйдэрин көрөр саҕа үчүгэй суох. Чахчы, оҕолор саҥа дьыллааҕы дьиктигэ итэҕэйэр буоллахтарына, ол туолар, — диэн Айсен Николаев «Инстаграмыгар» суруйда.

Айсен Николаев киин иитиллээччилэрин Саҥа дьылынан эҕэрдэлээтэ, чэгиэн доруобуйаны, үчүгэй үөрэҕи, ситиһиилэри баҕарда. Оҕолор кинини кытары хаартыскаҕа түһэн, кэпсэтэн-ипсэтэн дуоһуйдулар.

Ангелина Васильева, “Саха сирэ” хаһыат, edersaas.ru

Хаартыска: sakha.gov.ru

0
0

Добавить комментарий