Ил Дархан Николай Валуевы кытта ойууру чөлүгэр түһэрии туһунан кэпсэттэ
Атырдьах ыйын 30 күнүгэр Ил Дархан Айсен Николаев спортивнай диэйэтэл, Госдуума экологияҕа, тулалыыр эйгэни харыстааһыҥҥа кэмитиэтин бэрэссэдээтэлин бастакы солбуйааччы Николай Валуевы кытта көрсөн, эрэгийиэҥҥэ ойууру чөлүгэр түһэрии уонна кэккэ тирээн турар боппуруостары ырытта.
Өрөспүүбүлүкэ Аҕа баһылыга Айсен Николаев маннык уустук кэмҥэ дойду 16 эрэгийиэниттэн 75 волонтеру Бэс Күөлүн чөлүгэр түһэриигэ көмөлөһүннэрэ аҕалбытыгар Николай Валуевка истиҥ махталын тиэртэ.
Уопсастыбаннай диэйэтэл эрэгийиэн былааһын уорганнара эмсэҕэлээбит Бэс Күөлүгэр дьоһуннаах көмөнү оҥорбуттарын бэлиэтээн туран, баһаартан эмсэҕэлээбит дьон доруобуйатын бөҕөргөтөргө тустаах үлэ тэҥҥэ барбытын биһирээбитин биллэрдэ. Кини РФ Социальнай страхование пуондата Москва, Владимирскай уонна Тюменскай уобаластар бөдөҥ санаторийдарыгар эбии путевкалары көрбүтүн туһунан эттэ.
Баһаартан эмсэҕэлээбит Горнай, Бүлүү, Уус Алдан, Чурапчы, Хаҥалас улуустарыттан уонна Дьокуускай олохтоохторо — барыта 180 киһи атырдьах ыйын 27 күнүгэр санаторийдарга доруобуйаларын бөҕөргөтө көппүттэрэ.
Айсен Николаев уонна Николай Валуев ойууру чөлүгэр түһэрии боппуруостарын ырыттылар. Өрөспүүбүлүкэҕэ Саха сирин соҕуруу уонна киин улуустарыгар икки ойууру чөлүгэр түһэрэр питомниктары тэрийэр сорук турарын истэн, Госдуума экологияҕа, тулалыыр эйгэни харыстааһыҥҥа кэмитиэтин бэрэссэдээтэлин бастакы солбуйааччы Николай Валуев олус сэргээтэ. Кини маннык питомниктары дойду эрэгийэннэригэр тэрийэри былаанныырын иһитиннэрдэ.
Өрүттэр маны таһынан көрсүһүүгэ ойуур хаһаайыстыбатын харыстыыр салааны үбүлээһин, РФ Ойуур Кодексыгар уларытыылары киллэрии, ойууру харыстааһыҥҥа үлэлиир каадырдары хааччыйыы туһунан кэпсэттилэр.
Елена ПОТОЦКАЯ, «Саха сирэ» хаһыат.
Хаартыска — СИА.