Ил Дархан национальнай бырайыактарынан сыл бастакы аҥарыгар ыытыллыбыт үлэни билистэ
Быйыл бырайыактыыр хамаандалар национальнай бырайыактарынан ыытыллар үлэни былааннааһын уонна олоххо киллэрии боппуруостарыгар быдан хаачыстыбалаахтык үлэлээтилэр.
edersaas.ru
Ону үбү туһаныы динамиката итиэннэ хантараактары түһэрсии үрдүк таһымнааҕа кэрэһилииллэр. 2021 сыл бастакы аҥарын түмүгэ көрдөрөрүнэн, бары национальнай бырайыактар дьаһалларын олоххо киллэрии динамиката ааспыт сыл туһааннаах кэмин кытары тэҥнээтэххэ лаппа үрдүк. От ыйын 23 күнүгэр Айсен Николаевка ыытыллыбыт сүбэ мунньахха сыл бастакы аҥарыгар национальнай бырайыактар чэрчилэринэн контрактация, көрүллүбүт үбү туһаныы итиэннэ куонкурустары кэмигэр ыытыы боппуруостара көрүлүннүлэр.
Быйыл национальнай бырайыактары олоххо киллэриигэ 44 млрд 948 мөл солк көрүллүбүт. Барыта 2 833 хантараагы түһэрсэргэ былааннаммытыттан 2 238 хантараак түһэрсиллибит, ити сыллааҕы былаан 78 % тэҥ. Өрөспүүбүлүкэҕэ бу ааспыт алта ый устата куһаҕана суох үлэ ыытыллыбыт. Сорох бырайыактарга сыллааҕы былаан толоруллубут, сорохторго былааннамыт үлэ 20 % оҥоһуллубут. «Куттала суох, хаачыстыбалаах суол», «Олорор дьиэ-уот уонна куорат эйгэтэ» национальнай бырайыактарынан оҥоһуллубут үлэ сыл түмүгүнэн, үлэҕэ киллэриллибит дьиэ уонна оҥоһуллубут суол эбийиэктэрин кээмэйинэн сыаналанар. «Үлэ оҥорумтуота», «Дьоҕус уонна аччыгый урбаан итиэннэ биирдэм урбаан көҕүлээһинин өйөөһүн» национальнай бырайыактарынан көрдөрүү үчүгэй, сыллааҕы былаан толоруллубут кэриэтэ буолбут.
Анаалыс көрдөрөрүнэн, «Доруобуйа» национальнай бырайыак чэрчитинэн ыытыллар былаан толоруллубат куттала баар. Сыл түмүгүнэн бу национальнай бырайыак чэрчитинэн 53 көрдөрүү толоруллуохтаах, ити бары национальнай бырайыактарынан үлэ хайа тыырбыт аҥаарыгар тэҥнэһэр. «Доруобуйа» национальнай бырайыак сорох көрдөрүүлэрэ биллэр биричиинэнэн, коронавирус инфекциятын пандемиятынан сибээстээн, толоруллар кыахтара суох, онон сорох дьаһалларга кэккэ миэрэлэри чопчулуур ирдэнэр. Экономика министиэристибэтин чахчытынан, 44 эрэгийиэннээҕи бырайыак 123 көрдөрүүтүттэн 33 толоруллубут, сыл түмүгүнэн 11 көрдөрүү толоруллубат туруктаах.
«Цифровой экономика» национальнай бырайыагынан хас биирдии судаарыстыбаннай уонна муниципальнай өҥөлөрү электроннай көрүҥҥэ көһөрүү халандаарынай кыраапыга оҥоһуллубут. Маныаха сүрүн үлэ атырдьах уонна балаҕан ыйдарыгар былааннанар. Бу үлэ түмүктэннэҕинэ, сыллааҕы көрдөрүү толоруллуоҕа.
Айсен Николаев национальнай бырайыактарынан тэриллэр үлэни-хамнаһы сүрүннүүр бырабыыталыстыба вице-премьердэригэр сыллааҕы былааны толорууга быһаарыыны эрэйэр боппуруостары ураты хонтуруолга тутарга, ордук хантараактары түһэрсиини уонна куонкурустары тэрийиини болҕомтоҕо ыларга сорудахтаата. Өрөспүүбүлүкэҕэ национальнай бырайыактары олоххо киллэрии хаамыытын боппуруоһа кыбартаал аайы, оттон алтынньыттан ый аайы көрүллэр буолуоҕа диэтэ. Бу туһунан Ил Дархан уонна Бырабыыталыстыба пресс-сулууспата иһитиннэрэр. Хаартыскаҕа Андрей Сорокин түһэриилэрэ.
Раиса Сибирякова, «Саха сирэ» хаһыат, edersaas.ru