Ил Дархан Национальнай гвардия Илиҥҥи уокуругун командующайа Юрий Яшины кытары көрүстэ
Бүгүн Айсен Николаев Арассыыйа Национальнай гвардиятын Илиҥҥи уокуругун командующайа Юрий Яшины кытары көрүстэ.
edersaas.ru
Ил Дархан Саха Өрөспүүбүлүкэтигэр Национальнай гвардия уопсастыбаннай бэрээдэги араҥаччылааһыҥҥа, уопсастыбаҕа куттал суох буолуутун хааччыйыыга аналын дьоһуннук толорорун, ону таһынан баһаартан сэрэхтээх буолууга, баһаары умуруорууга уонна халааны утары үлэҕэ кыттыһарын бэлиэтээтэ. Алдаҥҥа коронавирус дьаҥын утары дьаһаллары олоххо киллэриигэ үлэлэспитин холобурдаан, Росгвардия баахтанан, дьыл кэминэн кэлэн үлэлиир дьону хонтуруоллааһыҥҥа үлэлиэн сөбүн эттэ.
Юрий Яшин өрөспүүбүлүкэҕэ уопсастыбаннай бэрээдэги араҥаччылааһыҥҥа, уопсастыбаҕа куттал суох буолуутун хааччыйыыга, ол иһигэр көҥүллүүр тиһиги тупсарыыга, чорботуллар соруктары быһаарыыга салгыы үлэлииргэ бэйэтин көрүүлэрин иһитиннэрдэ.
Айсен Николаев Национальнай гвардия курдук федеральнай структура салалтата былаас уорганнарын кытары биир санааны булан, үрдүк таһымнаахтык үлэлиирин бэлиэтээтэ диэн Ил Дархан уонна Бырабыыталыстыба пресс-сулууспата иһитиннэрэр.
Раиса Сибирякова, «Саха сирэ» хаһыат, edersaas.ru