Ил Дархан мунньаҕар үрдүк технологиялаах Жатайдааҕы суудуна верфэтин тутуу боппуруоһун көрдүлэр
Саха сирин баһылыга Айсен Николаев Жатайдааҕы суудунаны тутар уонна өрөмүөннүүр собуот баазатыгар үрдүк технологиялаах суудунаны тутар верфэни тэрийиигэ мунньах ыытта. “Өлүөнэтээҕи холбоһуктаах өрүс пароходствотын” ААУо флотун саҥардыыга, Өлүөнэ бассейныгар уонна Арассыыйа Арктика зонатыгар иһинээҕи уу тырааныспарынан быыстала суох таһаҕаһы тиэйиигэ туһуламмыт бырайыак 2019-2021 сылларга олоххо киириэхтээх.
Айсен Николаев туһааннаах инвестиционнай бырайыак өрөспүүбүлүкэ эрэ экэниэмикэтигэр буолбакка, дойдуга бүттүүнүгэр дьоһун суолталааҕын ыйда. “Арктика уонна бу инфраструктура сайдыытын кытта сибээстээх өрөспүүбүлүкэ сиригэр-уотугар ыытыллар бырайыактартан биирдэстэрэ, ол иһигэр федеральнай бүддьүөт суотугар. Инвестиционнай бырайыагы олоххо киллэриигэ федеральнай бүддьүөттэн 4 млрд 106 мөл солкуобай көрүлүннэ”, — диэн Саха сирин баһылыга бэлиэтээтэ.
СӨ Бырабыыталыстыбатын бэрэссэдээтэлин бастакы солбуйааччы Алексей Колодезников этэринэн, бырайыак икки түһүмэҕинэн ыытыллыаҕа. Суудунаны тутар уонна харайар комплексы тутууну кытта сибээстээх бастакы түһүмэҕи үлэҕэ киллэрии быйыл саҕаланыаҕа. Иккис түһүмэххэ Жатайдааҕы суудунаны өрөмүөннүүр уонна тутар собуот эбийиэктэрин саҥардыы уонна производственнай кыамталарын кэҥэтии ыытыллыаҕа. Эбийиэк 2021 сылга үлэҕэ киириэхтээх.
“Бастакы түһүмэххэ ааспыт сыл сэтинньи ыйыгар Арассыыйа Главгосэкспертизатын сөбүлэһэр түмүгүн ылбыппыт. Иккис түһүмэх бырайыактыыр докумуонун СӨ Госэкспертизатын управлениетыгар түһэрбиппит. Онон түмүгү муус устар ыйга кэтэһэбит”, — диэтэ Алексей Колодезников.
Өрөспүүбүлүкэ бырабыыталыстыбата Арассыыйа бырамыысыланнаска уонна эргиэҥҥэ министиэристибэтин кытта Жатайдааҕы суудуна верфэтин тутууну саҕалааһын тэрээһиннэрин тэрийэр үлэни ыытар. Маныаха үрдүк таһымнаах каадырдарынан хааччыйыыга уонна бэлэмнээһиҥҥэ кэккэ тэрээһиннэри торумнаатылар.
Бастакы вице-премьер өрөспүүбүлүкэ Бырабыыталыстыбата Уһук Илини уонна Арктиканы сайыннарыы министиэристибэтигэр бу суудуна верфэтин “Хаҥалас” ТОСЭР резиденнэрин ахсааннарыгар киллэрэргэ сайаапка түһэрбитин эттэ.
Саха Өрөспүүбүлүкэтин Ил Дарханын уонна бырабыыталыстыбатын пресс-сулууспата