Ил Дархан Егор Борисов бу күннэргэ Москваҕа үлэлии сылдьар. Бэҕэһээ РФ бырабыыталыстыбатын вице-премьерэ – Уһук Илин регионнарга РФ президенин боломуочуйалааҕа Юрий Трутневы кытары көрсөн социальнай бырайыактары кэпсэттэ.
Көрсүһүүгэ өрөспүүбүлүкэ экономикатыгар улахан оруолу ылар кииннэргэ социальнай тутуулары ыытыыны кэпсэттилэр. Ол курдук, “Соҕуруу Саха сирэ” урутаан сайдар сиргэ тутуллуохтаах социальнай эбийиэктэри, ону сэргэ, өрөспүүбүлүкэбитигэр искэн ыарыыны эмтиир сүҥкэн суолталаах диспансер, кардиология киинин тутуу боппуруостара ырытыыга турдулар.
Санатан эттэххэ, Юрий Трутнев олунньу саҥата Нерюнгрига кэлэн барбыта. Онно кини “Колмар” хампаанньа эбийиэктэрин көрбүтэ, соҕуруу Саха сирин сайдыытыгар мунньах ыыппыта. Суруналыыстары кытары көрсүһүүтүгэр социальнай бырагыраама туһунан Ил Дарханы кытары Москваҕа кэпсэтиэҕин туһунан иһитиннэрбитэ. «Колмар» Нерюнгрига медицина киинин, үлэһиттэргэ анаан дьиэлэри тутар санаалаах, Чульмаҥҥа коммунальнай хаһаайыстыба эбийиэктэрин өрөмүөннүөхтээх, ону сэргэ, аэропорду саҥардыыга үлэлэһэр.
“Бырайыактары этэҥҥэ көмүскээтибит. Бүгүн бырабыыталыстыба Уһук Илин регионнарга инвестиционнай бырайыактары олоххо киллэриигэ тэрийбит анал хамыыһыйатыгар өрөспүүбүлүкэни бүттүүн ылан көрүөхпүт. Ити бырайыактарбытын толорууга ылсар дьоҥҥо эппиэтинэһи үрдэтиэҕэ уонна Россия туһааннаах министиэристибэлэрин кытары үлэлэһиигэ көдьүүстээх буолуоҕа”, — диэн иһитиннэрэр Егор Афанасьевич.
Көрсүһүүгэ Егор Борисовы кытары СӨ бырабыыталыстыбатын бэрэссэдээтэлэ Евгений Чекин үлэлэһэ сылдьар.
Аграфена КУЗЬМИНА, “Саха сирэ” хаһыат.