СӨ Ил Дархана Егор Борисов бээтинсэҕэ Амма улууһун Покровкатыгар бара сылдьан “Амма” ТХПК үлэһиттэрин кытары көрүстэ. Кэпсэтии кэмигэр кини тэрилтэ инникитин сайдан атаҕар турарыгар хас биирдии үлэһит өйүн-санаатын уларытан хаһаайынныы сыһыаннаһыахтааҕын ордук тоһоҕолоон бэлиэтээтэ.
Аграфена Кузьмина, «Саха сирэ» хаһыат, www.edersaas.ru
Егор Афанасьевич, бастатан туран, ырыынак үйэтигэр олорорбутунан, оҥорон таһаарыыга үрдүкү технологияны туһаныахха наадатын эттэ. Ону сэргэ, моҥкуруут барыы оҥорон таһаарыыны чөлүгэр түһэрии биир ньымата буоларын, онон онтон куттанар наадата суоҕун бэлиэтээтэ.
“Үлэһиттэр бары акционернай уопсастыбаҕа көстүгүт. Үлэҕитин ыраас илиистэн саҕалыыгыт. Инникитин бу уопсастыба бурдугунан дьарыктанар сүрүн тэрилтэбит буолуохтаах. Ол эрээри эһиги бэйэҕит санааҕытын уларыппатаххытына, икки-үс сылынан эмиэ маннык балаһыанньаҕа төннөн кэлиэхпит. Онон үлэбитин-хамнаспытын саҥалыы тэринэн саҕалыахпыт иннинэ ити туһунан тоһоҕолоон бэлиэтиэхпин баҕарабын. Тэрилтэ сүрүн акционердарынан эһиги буолаҕыт, онон эппиэтинэс ылынан, бэйэбит хаһаайыстыбабыт диэн сананыҥ. Хаһаайынныы сыһыаннаһыҥ. Ырыынак экэниэмикэтигэр сөп түбэһиннэрэн үлэлиэҕиҥ. Санааҕытын уларытыҥ, билигин баар кэмҥэ сөп түбэһэн үлэлээҥ”. — диэн бэлиэтиир Ил Дархан.
Манна эбэн эттэххэ, “Амма” АУо сайыннарар туһуттан Покровкаҕа бурдугунан дьарыктанар агрокластер тэриллиэхтээх. Бастакы вице-премьер – тыа хаһаайыстыбатын миниистирэ Петр Алексеев бэлиэтииринэн, бу сылга концепцията оҥоһуллан, инфраструктураны тэрийиигэ сүрүн болҕомто ууруллуоҕа. Егор Борисов бу туһунан санатан туран: “Ыаллыы сытар улуустаргытыгар баран уопут атастаһыҥ. Атын дьон хайдах тэринэн олороллорун көрүҥ. Билигин судаарыстыба өттүттэн барытын оҥордубут, аны эһигиттэн тутулуктаах”, — диэн түмүккэ олохтоохтор санааларын биир ситимҥэ киллэрдэ.
Аграфена Кузьмина, «Саха сирэ» хаһыат, www.edersaas.ru