Айсен Николаев Москваҕа «Мегафон» ПАУо генеральнай дириэктэрэ Геворк Вермишяны кытары көрсөн, өрөспүүбүлүкэ Арктическай оройуоннарыгар телекоммуникацияны сайыннарыы тула кэпсэттилэр.
«Мегафон» хампаанньа Arctic Connect инфраструктурнай бырайыагы олоххо киллэрэн эрэр. Туһааннаах бырайыак үлэлээтэҕинэ сүрүн линияттан атын ситимнэр тутуллан, Арктика уонна Уһук Илин олохтоохторо хаачыстыбалаах сибээһинэн хааччыллыахтара.
Бүгүҥҥү туругунан 67 тыһыынча кэриҥэ киһи олорор өрөспүүбүлүкэ 13 муниципальнай оройуона сибээс оптическай ситимнэригэр холбоммокко олороллор. Спутник сибээһэ сыаната үрдүк буолан, сибээс күүскэ сайдыбат.
— «Мегафон» ПАУо билигин Хотугу муустаах акыйааныгар үлэҕэ киллэрэн эрэр бырайыага ханна да суох ураты суолталаах буолар. Хотугу муора суолунан аан бастакытын оптика сибээһэ баар буолуоҕа. Онон биһиги бу бырайыакка интэриэспит улахан. Арктическай бөһүөлэктэр бу сибээскэ холбонуо этилэр, — диэн Ил Дархан бэлиэтээн эттэ.
Көрсүһүү кэмигэр маны таһынан өрөспүүбүлүкэҕэ улахан суолталаах боппуруостар тула кэпсэтии таҕыста. Ол иһигэр Тиксиигэ Мегафон сибээһин сайыннарыы боппуруостара.
СӨ Ил Дарханын уонна Бырабыыталыстыбатын пресс-сулууспата