Бүгүн, сэтинньи 28 күнүгэр, Ил Дархан Айсен Николаев мэдиссиинискэй мааскалары оҥорор сыах үлэтин кытта билистэ. Сыаҕы «Якутия» технопаарка резиденэ — «Стандарт 14» хампаанньа «Сатал» микрооройуоҥҥа үлэлэтэр.
Сыах үлэтин туһунан инновация миниистирэ Анатолий Семёнов уонна «Стандарт 14» хампаанньа дириэктэрэ Александр Намын кэпсээтилэр.
Сыахха түөрт станок үлэлиир. Икки станоктарыттан биирдэстэрэ мүнүүтэҕэ 100 мэдиссиинискэй маасканы, биирэ кулгаахха иилиллэр быатын оҥорон таһаараллар. Онтон икки станок быаны мааскаҕа тигэн биэрэр.
Маасканы оҥорууга спанбонд уонна СМС диэн матырыйааллары туһаналлар. Биир матырыйаала антибактериальнай уонна гипоаллергеннай, иккиһэ фильтр оруолун толорор.
Биир мааска сыаната 3 солкуобайтан үөһээ буолуоҕа. Кууһунан атыылаһааччыларга чэпчэтии көрүллүөҕэ.
«Ковиды утары охсуһуу үлэ иитинэн кэккэ кыһалҕалар бааллара. Олортон биирдэстэринэн харыстанар мааска суоҕа этэ. Билигин ити кыһалҕа быһаарылынна. Маасканы кыраныысса таһыттан аҕалаллар. Бу кыһалҕа тула биһиги олохтоох урбаанньыттары кытта элбэхтик кэпсэппиппит. Технопаарка резиденэ «Стандарт 14» хампаанньа Дьокуускайга маасканы оҥорон таһаарар сыаҕы үлэлэтэр буолбутуттан үөрдүбүт», — диэн Айсен Николаев эттэ.
Харыстанар мааскаҕы наадыйыы үрдээтэҕинэ, «Технопаарк» производствоны өссө кэҥэтиигэ үлэлэһиэҕэ.
Билигин биир симиэнэҕэ 20 тыһыынча устуука мэдиссиинискэй маасканы оҥорон таһаараллар.
Сыах үлэтин көрүү-истии түмүгэр, Айсен Николаев урбаанньыттарга өссө атын харыстанар сириэстибэлэри, холобур, антисептиктары оҥорон таһаарар туһунан эттэ.
СӨ Ил Дарханын уонна Бырабыыталыстыбатын пресс-сулууспата