СӨ Ил Дархана Айсен Николаев быһа эпииригэр Эдьигээн улууһун олохтооҕо кинилэр оройуоннарыгар офтальмолог-быраас үһүс сылын суоҕун туһунан иһитиннэрдэ. Кини харахтара ыалдьыбыт дьону мэдиссиинискэй сиэстэрэлэр көрөллөрүн уонна үөскээбит уустук балаһыанньаны быраастары командироваҕа ыытан быһаарар туһунан көрдөстө.
edersaas.ru
Айсен Николаев, бастатан туран, Эдьигээн олохтоохторун үбүлүөйдээх, 390 сылларынан эҕэрдэлээтэ.
«Хомойуох иһин, «узкай» идэлээх исписэлиистэр Арктикаҕа эрэ буолбакка, өрөспүүбүлүкэ атын улуустарыгар эмиэ тиийбэттэр, сытыы кыһалҕа буолла. Урут балаһыанньаттан хайдах эрэ тахсар, атын эрэгийиэннэртэн быраастары ыҥыран кыһалҕаны быһаарар буоллахпытына, билигин атын эрэгийиэннэргэ эмиэ ыарахан. Биһиги билигин мэдиссиинискэй орто уонна үрдүк үөрэх кыһаларыгар үөрэниэхтээх дьон ахсаанын элбэтэр сүрүн соруктаахпытын өйдүүбүн. Онуоха улахан үлэни СӨ Наукаҕа министиэристибэтэ ыытар. ХИФУ мэдиссиинэ институтун саҥа дьиэтэ тутуллуоҕа, билигин бырайыактыыр-сметалыыр үлэтэ түмүктэннэ, эспэртиисэни барар. Онон федеральнай бырагыраамаҕа киирэн, эбийиэги тутуохпут диэн эрэнэбин. Оччоҕо эмчиттэргэ наадыйыыбытын сабар кыах үөскүөҕэ», -– диэн эрэлин биллэрдэ.
Ону таһынан Ил Дархан мэдиссиинэ салаатыгар баар кыахтарбытын барытын туһаныахтаахпыт туһунан эттэ. Бастатан туран, телемэдиссиинэ биһиэхэ күүскэ сайдар. Өскөтүн 2020 сыллаахха өрөспүүбүлүкэҕэ 10 тыһыынча телеконсультация оҥоһуллубут буоллаҕына, былырыын -– 12,5 тыһыынча.
Иккиһинэн, улуустааҕы киин балыыһалар ыраах сытар нэһилиэнньэлээх пууннарга «көлүөһэлээх балыыһа» массыынанан тиийэр кыахтаахтар. Ол гынан баран, тоҕо эрэ, сорох улуустар баар кыаҕы сатаан туһамматтар. Ол туһунан Айсен Сергеевич:
«Былырыын сыл бүтүүтэ мэдиссиинискэй тэриллэринэн сэбилэммит «көлүөһэлээх балыыһа» массыыналар улуустарга бэриллибиттэрэ. Хомойуох иһин, ол массыыналар туһаныллыбакка таах туралларын туһунан олус элбэх үҥсүү киирдэ уонна прокуратура туоһуласта. Мин кылаабынай быраастар тоҕо итинник дьаһаналларын соччо өйдөөбөтүм. Инникитин даҕаны тиэхиньикэ барыта үлэлиирин хонтуруоллуохпут«, — диэтэ.
Онтон офтальмолог-быраастара суох сирдэргэ Дьокуускайтан быраастар тиийэллэрин ситиһиэхпит диэтэ уонна Офтальмология өрөспүүбүлүкэтээҕи балыыһатын улуустарга тиийэн үлэлиир үөрүйэҕин холобурдаата.
Надежда ЕГОРОВА, «Саха сирэ» хаһыат, edersaas.ru