Ил Дархан маассабай вакцинация боппуруоһунан улуус баһылыктарыгар мунньах ыытта
![](https://edersaas.ru/wp-content/uploads/2021/01/de5649ffc3351175a3c9a6d724170f5ab6f5158f.jpg)
Кини чугастааҕы кэм сүрүн соругунан вакцинацияны ыытыы диэн эттэ. Өрөспүүбүлүкэҕэ 27292 доза вакцина аҕалыллыбыт. Тохсунньу 21 күнүнээҕи туругунан 3,5 тыһыынча кэриҥэ киһи быһыыны ылбыт. Билигин Дьокуускай куоракка итиэннэ Амма, Үөһээ Бүлүү, Бүлүү, Горнай, Мэҥэ Хаҥалас, Мииринэй, Нам, Ньурба, Сунтаар, Таатта, Уус Алдан, Хаҥалас, Чурапчы улуустарыгар быһыыны биэрэн эрэллэр.
Мантан инньэ атын улуустарга эмиэ быһыыны биэрии саҕаланарынан сибээстээн, нэһилиэнньэҕэ иһитиннэрэр, өйдөтөр үлэни ыытар итиэннэ препараты харайыы, тиэйии-таһыы боппуруостарынан үлэ ыытыллыахтаах.
Ил Дархан эпидемиологическай ирдэбиллэр хайаан да тутуһуллуохтаахтарын эттэ. Ол иһигэр бүддьүөт үлэһиттэрин 50% ыраахтан олорон үлэҕэ көһөрүү боппуруостарын.
«Сорох оройуоннарга бүддьүөт үлэһиттэрин ыраахтан олорон үлэҕэ көһөрүү ирдэбиллэрэ тутуһуллубаттарын этэллэр.Хоту улуустарга ыалдьар дьон ахсаана аҕыйаҕын учуоттаатахха, атын улуустарга балаһыанньа атын. Ыарыы сүттэ диир сыыһа. Өссө даҕаны дьаҥҥа хаптарааччы ахсаана элбиэн сөбүн умнар табыллыбат», — диэн бэлиэтээн эттэ кини.
Маны таһынан Ил Дархан маассабай тэрээһиннэр ыытыллыа суохтаахтарын, 65 саастарыттан үөһээ саастаах, хроническай ыарыылаах гражданнар тэйиччиттэн олорон үлэҕэ үлэлиллэрэ тутуһуллуохтааҕын эттэ.
Сантан эттэххэ, олунньу бүтүүтэ Саха сиригэр 70 тыһыынча кэриҥэ доза вакцина кэлэрэ күүтүллэр.
СӨ Ил Дарханын уонна Бырабыыталыстыбатын пресс-сулууспата