Айсен Николаев Үлэ Дьоруойа Владимир Михайловы кытта көрүстэ. Биир дойдулаахпыт Ил Дархаҥҥа Москваҕа сырыытын туһунан, хайдах көрсүбүттэрин кэпсээтэ. Санатан эттэххэ, бэс ыйын 12 күнүгэр, Арассыыйа күнүгэр Кремльгэ дойдубут бэрэсидьиэнэ Владимир Путин Владимир Михайловка «РФ Үлэ Дьоруойа» мэтээли туттарбыта.
— Судаарыстыба баһылыгын илиититтэн үрдүк наҕарааданы ылыы олус долгутуулаах этэ. Бу иннинэ, 2013 сыллаахха, бэрэсидьиэн илиититтэн наҕараада тутан турабын. Бу сырыыга дойдубут бэрэсидьиэнэ тэрээһин иннинэ кэлэн, илии тутуһан ааспыта. Владимир Путин эҕэдэлээн баран салгыы таһаарыылаах үлэбин салгыы турарбар баҕа санаатын эттэ. Наҕараадалары туттарыы кэнниттэн биһиги сэлиэнньэбитигэр 400 миэстэлээх сүөһү иитэр комплексы уонна култуура дьиэтин тутуу туһунан боппуруостарын көтөхтүм. Бэрэсидьиэн бу боппуруостар быһаарыллыахтара диэн эрэннэрдэ.
Владимир Михайлов этэринэн, Москваҕа кэргэнин уонна кыыһын кытта бэрт үчүгэйдик сынньаммыттар, киин куорат бэлиэ сирдэрин кэрийбиттэр. Арассыыйа күнүгэр Кыайыы пааркатыгар судаарыстыбаннай былааҕы өрө көтөҕүү сиэригэр-туомугар кыттыыны ылбыт.
Үлэ Дьоруойа этэринэн, кини быйыл 53-с сылын ыанньыксытынан үлэлиир, “доруобуйам кэминэн, онон өссө даҕаны 5-6 сыл үлэлиир былааннаахпын” диир. Владимир Африканович өрөспүүбүлүкэ, улуус, нэһилиэк салалталарыгар өрүү өйүү сылдьалларын иһин махтал тылын эттэ.
Айсен Николаев Үлэ Дьоруойугар кытаанах доруобуйаны, киниэхэ уонна «Кириэстээх» кэпэрэтиип кэлэктиибигэр үрдүк таһаарыылаах үлэни баҕара хаалла.
edersaas.ru