Ил Дархан: Харчыны омук бааныгар харайыахтааҕар, муостаны тутар быдан ордук

Айсен Николаев ТАСС-ка биэрбит интервьютугар Өлүөнэ муостатын тутуутун уонна Жатайдааҕы  суудуна верфэтин туһунан кэпсээтэ.

Айсен Николаев тоһоҕолоон бэлиэтээбитинэн, суол уонна муоста тутуута ис оҥорон таһаарыыга көдьүүстээх уонна тастан киириттэн тутулуга суох. Онон сааҥсыйа сабыдыалла суоҕа.

— Тутуу болдьоҕор саамай оруоллааҕа – үп боппуруоһа. Харчыны хаһан баҕарар сымыйа сылтаҕынан хатаан кэбиһиэхтэрин сөп ханнык эрэ омук бааныгар харайа сытыахтааҕар, муоста тутуутугар ыыппыт быдан көдьүүстээх, — диэн чуо-бааччы быһааран биэрдэ.

Ил Дархан этэринэн, Арҕааҥы сааҥсыйалартан сылтаан Өлүөнэ муостатын сыаната үрдүөн сөп. Ол тутуу матыйаалларыттан, чуолаан, тимир конструкциялар сыаналара үрдээһиниттэн.

— Хара маҥнайгыттан, муостабыт бырайыагар тастан киирии матырыйаалы аҕыйаппыппыт. Ол иһин билигин судаарыстыбыннай бэрэбиэркэҕэ барбыт барылбытыгар итинник импортнай матырыйаал дуона суох. Наадалааҕы атын доҕордуу дойдулартан көҥүл булуохха сөп, — диэн кини уоскутар.

Тутулла турар Жатайдааҕы суудуна верфэтин тутуута тоҕо бытаарбытын туһунан ыйытыкка, Ил Дархан былырыын верфэ приватизацияланар испииһэккэ киирбититтэн боппуруос үөскээбитин ыйда. Айсен Николаев премьер-миниистир Михаил Мишустиҥҥа туруорсан ити испииһэктэн Жатайдааҕы верфэ таһаарыллыбыт. Мантан салгыы Саха Өрөспүүбүлүкэтэ тутууну эрэгийиэннээҕи бүддьүөттэн хос үбүлэһэр туһугар сорох федеральнай акциялары субъекка биэрэри туруорсубут. Билигин ити туруорсуубутун көрө сылдьаллар. Тимирконструцияны аҕалбыттар, тутуу барар, онон хаалыы сыыйа туоратыллыаҕа.

Интервьютун толору манна ааҕыҥ. 

«Саха сирэ» хаһыат