Айсен Николаев Хаандыгаҕа олорор сэрии бэтэрээнэ Ирина Баженоваҕа бастакы үбүлүөйдээх мэтээли туттарда.
“РФ бэрэсидьиэнэ Владимир Путин сорудаҕын толорор чиэскэ тиксэн, “1941-1945 сс. Аҕа дойду улуу сэриитигэр Кыайыы 75 сыла” мэтээли өрөспүүбүлүкэҕэ аан бастакынан эйиэхэ туттарабын. Эйигинэн сирэйдээн фроҥҥа уонна тыылга Ийэ дойдуларын көмүскээбит аҕа көлүөнэҕэ махталбын биллэрэбин”, — диэн Айсен Сергеевич эттэ.
Ирина Прокопьевна 1943 сыллаахха 18 саастааҕар ыҥырыллан, Амур уобалаһыгар сулууспалаабыт. Кини тимир суолу, муосталары харабыллаабыт. Тимир суолунан илиҥҥи сэриигэ саллааттар, бойобуой сэп-сэбиргэл, тиэхиньикэ, ас-үөл тиэллэр эбит.
“1941-1945 сс. Аҕа дойду улуу сэриитигэр Кыайыы 75 сыла” мэтээли Владимир Путин 2019 сыл бэс ыйын 13 күнүнээҕи ыйааҕынан олохтообута. Маннык мэтээлинэн сэрии кыттыылаахтара, тыыл бэтэрээннэрэ, хансылааҕырга хаайыллыбыт оҕолор наҕараадаланаллар.
Ангелина Васильева, “Саха сирэ” хаһыат, edersaas.ru