Ааһан эрэр нэдиэлэ саҥатыгар Ил Дархан Айсен Николаев Бүлүү бөлөх улуустарга үлэлээтэ. Атырдьах ыйын 31 күнүгэр Бүлүүгэ сылдьыбыта.
Бу туһунан «Күүлэт» кэпэрэтиип салайааччыта Елена Тутукарова: «Ил Дархан Айсен Николаев Бүлүүгэ кэлэ сылдьан, аһара ардаан оту бэлэмнээһиҥҥэ ыксаллаах быһыы-майгы эрэсиимэ биллэриллибитинэн баар кыһалҕалары хайдах-туох туоратар былааннаахпытын иһиттэ. 25 төбө ынахтан үөһэ бэриллэр үп быһаарыллыбакка турарынан ону түргэнник Тыа хаһаайыстыбатын министиэристибэтэ быһаарарыгар сорудахтаата. Биһиги улууска сайыны быһа тохтоло суох ардаабытын түмүгэр, охсуллубут оппут үксэ ууга барбыта, кэбиһиллибит оппут кытары. Онон хаар түһүөр диэри оттуур былааннаахпыт. Балаҕан ыйыгар күн-дьыл туран биэриэ диэн эрэнэбит. Айсен Сергеевич быйыл эбии аһылыгы (уотурба, эбиэс) тиэйии ороскуотун сэргэ атыылаһыллар харчытыттан 50 %-нын субсидиялыыр мэхэньиисими Тыа хаһаайыстыбатын министиэристибэтигэр оҥороругар сорудахтаабытын сүөһү иитиитинэн дьарыктанар аграрийдар үөрэ иһиттибит. Биһиги кыһалҕалаах кэммитигэр Ил Дархаммыт кэлэн балаһыанньаны көрөн-истэн барбыта олус үчүгэй», — диэн санаатын үллэһиннэ.