Ил Дархан куубагар Арассыыйатааҕы дуобат турнира: оҕо тириэньэрин санаата

Ил Дархан Айсен Николаев Арассыыйатааҕы куубагар дуобакка турнирын кыайыылааҕынан Крым кыттааччыта Сергей Белошеев буолла. Гранд – финалга элбэх төгүллээх чөмпүйүөнү Гаврил Колесовы кыайда.

Гранд – финал атырдьах ыйын 20 күнүгэр Дьокуускай куорат Гагарин аатынан култуура дыбарыаһыгар буолла. Финал бастакы түһүмэҕэр барыта Арассыыйа 15 эрэгийиэниттэн 89 дуобатчыт, ол иһигэр 15 гроссмейстер уонна 30- ча маастар кыттыыны ыллылар. Бастакы түһүмэх тоҕус турдаах ааста. Бу түмүгүнэн аҕыс бастыҥнар плей – офф стадияҕа тахсыбыттара.
Сергей Белошеевка кыайыылаах мантиятын, чөмпүйүөн көмүс мэтээлин, куубагы уонна үрүҥ көмүстэн оҥоһуллубут коронаны туттардылар. Гаврил Колесов тэрийээччилэртэн 200 тыһыынчаны тутта. Үһүс миэстэни ылбыт Москва уобалаһыттан эдэркээн Иван Илясов 100 тыһыынчанан наҕараадаланна.
Ону таһынан, сааһыттан тутулуга суох, аһаҕас турниры ыытыллыбыта. Манна кыттааччылар маастарга хандьыдаат нуорматын толордулар.

СӨ үөрэҕириитин туйгуна, оҕо тириэньэрэ Акулина Беляева санаатын кытта үллэстэр: “Ф.И. Авдеева аатынан Оҕо дыбарыаһыттан уопсайа 21 оҕо кытынна. Биһиги, нууччалыы эттэххэ, «эстафетная палочка” ньыманан үлэлиибит. Холобур, Иван Олегович Павлов сэттэ оҕобун кынатын дабыдалыгар илдьэ сылдьар. Элбэх оҕолорбут миэстэлэстилэр. 2009 сылтан Оҕо дыбарыаһыгар үлэлиибин. Бастатан туран, оҕо дуобакка үөрэниэн иннинэ, бэйэтэ баҕарыхтаах. Күһэйии өттүнэн буоллаҕына, туох да табыллыбат. Дуобатчыт оҕолор үөрэхтэригэр бары үчүгэйдэр диэн этиэхпин баҕарабын. Тохтообокко, утумнаахтык дьарыктанар оҕолор, бэйэҕит көрбүккүт курдук, гроссмейстердарга тиийэ үүнэллэр. Сахабыт сиригэр дуобат курдук успуорт көрүҥэр болҕомто уурулларыттан үөрэбит».