Ил Дархан Айсен Николаев бэйэтин социальнай ситимигэр Арассыыйа ЫБММ миниистирэ Евгений Зиничев соһумардык күн сириттэн туораабытынан, дириҥ кутурҕанын биллэрдэ.
— Иэдээннээх түгэнтэн Арассыыйа дьиҥнээх патриота, Саха сирин улахан доҕоро, РФ ЫБММ миниистирэ Евгений Николаевич Зиничев сырдык тыына быһынна…
Евгений Николаевич күүстээх эр санаалаах, аламаҕай уонна үтүө киһи этэ. Кини биһиги өрөспүүбүлүкэбитин ис сүрэҕиттэн өйүүрэ. Халаан, ойуур баһаара буолар түгэнигэр маҥнайгынан көмөҕө кэлэрэ. Бу сайын мин кинини кытта күн аайы кэриэтэ алтыспыппыт, ойуур баһаардарын утары быһаарыылары ыларбыт, олус чугастык билсибиппит… Кини биһиги тайҕа туһугар киирсиигэ кыайыыбытыгар сүдү оруоллаах.
Бэҕэһээ эрэ, Арктикатааҕы үөрэхтэр саҕаланыахтарын иннинэ Евгений Николаевичтыын кэпсэппитим. Кини тута тыа баһаардарын туругун ыйыппыта, лаппа аҕыйаабыттарын туһунан истэн олус үөрбүтэ…
Бары Саха сирин олохтоохторун аатыттан Евгений Николаевич аймахтарыгар уонна чугас дьонугар дириҥ кутурҕаммын тиэрдэбин.
Хаартыска Ил Дархан инстаграмыттан