СӨ Ил Дархана Айсен Николаев Пермь куорат университетыгар ытыалааһыҥҥа сырдык тыыннара быстыбыт дьон дьиэ кэргэттэригэр дириҥ кутурҕанын биллэрдэ.
Балаҕан ыйын 20 күнүгэр, Пермнээҕи судаарыстыбаннай национальнай исследовательскай университет куорпустарыттан биирдэстэрин территориятыгар сылдьар устудьуон булт саатынан (гладкоствольное ружье) дьону ытыалаабыт. РФ силиэстийэлиир кэмитиэтин официальнай саайтыгар иһитиннэрбиттэринэн, чопчуламмыт дааннайынан, 6 киһи өлбүт. Эмсэҕэлээбит 28 киһиэхэ мэдиссиинэ көмөтө оҥоһуллубут, кинилэртэн сорохторо оһоллонон уонна араас истиэпэннээх бааһырыылаах балыыһаҕа киллэриллибиттэр.
Буруйдаах быһаарыллыбыт. Тутарга утарылаһан бааһырбытын, мэдиссиинэ тэрилтэтигэр илдьибиттэр. Силиэстийэнэн уорбаланааччыны характеристикалыыр матырыйааллар хомуллаллар. Биллэринэн, кини сааны ыам ыйыгар атыыласпыт.
СӨ Ил Дархан уонна Бырабыыталыстыба пресс-сулууспата