Бүгүн Ил Дархан Айсен Николаев РФ гражданскай оборонаҕа, ыксаллаах быһыыга-майгыга миниистирэ, генерал Евгений Зиничев ыыппыт Арассыыйа Арктическай зонатыгар киирэр сири-уоту харыстыырга туһуламмыт «Куттала суох Арктика — 2021» биэдэмистибэлэр икки ардыларынааҕы чинчийии уопутун үөрэтиигэ аналлаах видео-кэмпириэнсийэҕэ кыттыыны ылла.
Суолталаах тэрээһин өрөспүүбүлкэ 13 улууһугар научнай уопсастыбалар чилиэннэрэ кыттыылаах РФ Бэрэсидьиэнэ Владимир Путин Арассыыйа Арктическай зонатыгар киирэр 7 эрэгийиэнэ араас ыксаллаах түбэлтэҕэ төһө бэлэмнээхтэрин сыаналыыр сорудаҕын чэрчитинэн ыытыллар. Бүгүн Дьокуускайга тэрээһин чэрчитинэн Арктическай зонаҕа килиимэт уларыйыытыттан тахсар содулу туоратыыга научнай чинчийиини ыытыыга туһуламмыт төгүрүк остуол буолла.
Ил Дархан Айсен Николаев «Мин историям» Мусуой комплексыгар Арктика куттала суох буолуутугар туһуламмыт тиэхиньикэ, араас аныгы тэрил быыстапкатын көрдө-иһиттэ, билистэ.
Бу күннэргэ дьыалабыай уонна социальнай бырагыраамаларга олоҕуран, пленарнай мунньахтар, төгүрүк остуоллар, маастар кылаастар, аһаҕас ааннар күннэрэ уо.д. а. интэриэһинэй тэрээһиннэр буолуохтара.
Айсен Николаев РФ ЫБМ миниистиригэр «Куттала суох Арктика — 2021» биэдэмистибэлэр икки ардыларынааҕы чинчийии уопутун үөрэтиигэ салайар уорганнар толору бэлэмнэрин туһунан иһитиннэрдэ. Ил Дархан өрөспүүбүлүкэ олохтоохторун аатыттан Евгений Зиничевка уонна ЫБМ үлэһиттэригэр ойуур баһаардарын умулларыыга көмөлөспүттэригэр истиҥ махталын тиэртэ.
Елена ПОТОЦКАЯ, «Саха сирэ» хаһыат.