Ил Дархан коронавирус утары быһыы туһунан “Арассыыйа хаһыатыгар” интервью биэрдэ
СӨ Ил Дархана Айсен Николаев коронавирус дьаҥын утары быһыы туһунан “Российская газета” саайтка интервью биэрдэ.
— Бүгүн тутаах кыһалҕалартан биирдэстэринэн нэһилиэнньэ ортотугар быһыыны туруоруу буолар. Биллэрин курдук, Саха сиригэр мобильнай пууннар ахсааннара эбилиннэ, оннооҕор тыйаатырга түүн быһыыны ылыахха сөп. Эһиги сабаҕалааһыҥҥытынан нэһилиэнньэ 70 бырыһыана быһыыны ылыыта өрөспүүбүлүкэҕэ хаһан ситиһиллиэн сөбүй?
— Вакцинация — улахан суолталаах. Туох да диэбиттэрин иһин, тус бэйэм коронавирус дьаҥын утары туһаныллар сүрүн уонна соҕотох ньыма буолар дии саныыбын. Маассабай быһыыны ылбыт дойдуларга балаһыанньа биллэ тупсубута ону туоһулуур.
Саха сиригэр быһыыны ылыы хаамыыта дойду орто көрдөрүүтүнээҕэр үрдүк. Билиҥҥи кэмҥэ 175 тыһыынча киһи номнуо быһыыны ылан турар. Ол эрээри, ылбыт тэтими намтаппакка, өссө күүһүрдэн биэриэхтээхпит. Хомойуох иһин, сымыйа иһитиннэриилэр (фейковые новости) уонна кэккэ дьоҥҥо “антипрививочнай” солуута суох тымтыы улаханнык мэһэйдииллэр.
Демократия бириинсибин өйдүүр наада: биир киһи көҥүлэ, атын киһини таарыйарынан сарбыллар. Өскөтүн учуутал вакцинацияттан аккаастанар буоллаҕына, оҕо педагогтан сыстыан сөбүн билэн туран, киһи бэйэтин оҕотун кылааска хайдах ыытыай? Элбэх дьону кытта хантаактаһар социальнай суолталаах идэлээх дьоҥҥо арыый кытаанах соҕус бэлиитикэни ыытар наадатыгар эрэллээхпин. Быһыыны туруоруу кинилэргэ булгуччулаах буолуохтаах. Мин ити курдук саныырым иһин, миигин үгүстэр киритикэлииллэр. Ол эрээри, бу түгэҥҥэ былаас баһыйар үгүс дьон интэриэһин көмүскүүр. Дьон доруобуйатын көмүскээһин – судаарыстыба булгуччу толоруохтаах эбээһинэһэ.
Эппитим курдук, Саха сиригэр 175 тыһыынча киһи быһыыны ылла. Улахан нэһилиэнньэ 75 бырыһыанын таһымын ыларга, өссө биир бачча быһыыны туруорар наада.
Интервьюну сиһилии https://rg.ru/2021/06/04/reg-dfo/ajsen-nikolaev-iakutiia-vojdet-v-klub-80.html сигэнэн киирэн ааҕыҥ.
“Российская газета” саайтан.