Ил Дархан Айсен Николаев бэс ыйын 16 күнүгэр “Уһук Илин: COVID-19 кэнниттэн олох” диэн тиэмэлээх Ленскэй кулууп мунньаҕар өрөспүүбүлүкэ уопутун кэпсээтэ.
Мунньахха Уһук Илин эрэгийиэннэрин губернатордара, дойду бастыҥ эспиэрдэрэ кытыннылар.
Пандемия кэмигэр өрөспүүбүлүкэ бырабыыталыстыбатын үлэтин биир сүрүн хайысхатынан нэһилиэнньэҕэ суһаллык, систиэмэлээхтик сырдатыы буоларын кэпсээтэ. Манна Ил Дархан күн аайы балаһыанньаны кэпсиир брифиннэрэ, нэдиэлэ ахсын тахсар социальнай ситимнэргэ быһа эпиирдэрэ киирэллэр. Ону тэҥэ, миниистирдэр эмиэ быһа эпииргэ тахсан, дьон ыйытыытыгар хоруйдууллар. Нэһилиэнньэни кытта үлэ бу ньыматын инникитин өссө салгыыр былааннаахтар.
Маны сэргэ, Айсен Николаев волонтерскай хамсааһын, аһымал санаа аахсыйаларын туһунан кэпсээтэ. Уустук кэмҥэ дьон бэйэ-бэйэлэрин өйөһөн, көмөлөһөн, үтүө хаачыстыбаларын көрдөрдүлэр. Пандемия кэмигэр волонтердар кэккэлэрэ аҕыйаабакка, элбии турар. Онон элбэх дьоҥҥо, ордук дьиэҕэ олорор кырдьаҕастарга, инбэлииттэргэ көмөлөрө улахан. Аччыгый уонна орто биисинэс бэрэстэбиитэллэрэ эмиэ туора турбатылар.
Салгыы пандемия кэнниттэн экэниэмикэни чөлүгэр түһэрии, биисинэһи уонна кэмиэрчэскэйэ суох уопсастыбаннай түмсүүлэри өйөөһүн, социальнай бэлиитикэ, улахан инвестиционнай бырайыактар тустарынан кэпсэттилэр.
Забайкальскай кыраай губернатора Александр Осипов уонна Камчатка губернаторын э.т. Владимир Солодов коронавируһу утары охсуһуу уопутун кэпсээтилэр. Эспиэрдэр Саха сирин уопутун бастыҥынан сыаналаатылар.
Түмүккэ Айсен Николаев этии киллэрдэ: “Пандемия кэнниттэн бииргэ үлэлэһэргэ эмиэ саҥа ньымалар ирдэнэллэр. Онон Уһук Илин эрэгийиэннэрэ бииргэ үлэлэһэргэ сөбүлэһии түһэрсиэҕиҥ. Манна доруобуйа харыстабылыгар, экэниэмикэҕэ, социальнай бэлиитикэҕэ, цифровой технологияларга, о.д.а. бииргэ үлэлэһэр, кмөлөсүһэр бырайыактар бааллар. РФ бэрэсидьиэнин Уһук Илиҥҥэ боломуочунайа Юрий Трутневтыын кэпсэппиппэр, кини өйөөбүтэ”, — диэн эттэ.
Губернатордар Айсен Николаев көҕүлээһинин толору өйүүллэрин биллэрдилэр.
Ангелина Васильева, “Саха сирэ” хаһыат, edersaas.ru
Хаартыска: Sakhagov.ru