Ил Дархан коронавируһу утары быһыыны биэрэр пууннар үлэлэрин бэрэбиэркэлээтэ

«Дьокуускай куорат 3 №-дээх балыыһатын сиригэр-уотугар олорооччулартан, улахан дьон ортотугар 60% кэриҥэ киһи быһыыны ылбыт. Күргүөм иммунитеттанар туһуттан, өрөспүүбүлүкэҕэ былаанныммыт 80% көрдөрүүгэ дьулуһуохпутун наада«, — диэтэ Ил Дархан.

Балыыһа көрөр-истэр сиригэр-уотугар үс уокурук киирэр: Сайсары, Автодорожнай уонна Октябрьскай сороҕо, Табаҕа ( Табаҕа -1, кырдьаҕас Табаҕа, Владимировка сэл.), Хатас уонна Покровскай, Бүлүүлүүр суоллар сорох аадырыстара, Хатыҥ-Үрэх уонна Сэргэлээх сорох аадырыстара, Дьокуускайдааҕы көтөрү иитэр фабрика, ДСК, Радиокиин, ирбэт тоҥу үөрэтэр институт (Мерзлотоведение институтун) сорох аадырыстара.

Мэдиссиинэ үлэһиттэрэ этэллэринэн, «Туймаада» атыы-эргиэн киинигэр баар пууҥҥа күн ахсын 50-60, Дьокуускайдааҕы 3 №-дээх балыыһаҕа 280 кэриҥэ киһи быһыыны ылар. Өрөбүл күннэринэн биллэриллибит нэдиэҕэ, күн ахсын 700 киһи сылдьарын күүтэллэр.

Балыыһа кылаабынай бырааһа Светлана Давыдова иһитиннэрбитинэн, быһыыны биэрэр хостор Дьокуускайга почта сүрүн дьиэтигэр (Главпочтамт), Хатаска уонна Табаҕаҕа бааллар. Маны таһынан, олохтоохтор сайаапкаларынан мобильнай биригээдэлэр тиийэллэр. Светлана Давыдова бэлиэтииринэн, QR-куодунан киирии олохтонуоҕуттан, быһыыны ылыан баҕалаахтар биллэ элбээбиттэр. Ол түмүгэр, быһыыны биэрии тэтимэ 2-3 төгүл улааппыт.

Санатан эттэххэ, өрөспүүбүлүкэҕэ алтынньы 30 — сэтинньи 1 күннэрэ өрөбүл күннэринэн биллэриллибиттэрэ. Алтынньы 20 күнүттэн уопсастыбаннай сирдэргэ  QR-куодунан киирии түһүмэхтэринэн сыыйа саҕаламмыта. Сэтинньи 1 күнүттэн эрэстэрээҥҥэ, кафеҕа, остолобуойга уонна банкеттыыр саалаҕа QR-куодтаах эрэ буоллаххына сылдьаҕын. Сэтинньи 8 күнүттэн аны атыы-эргиэн кииннэригэр ити ирдэбил киириэҕэ.