Бүгүн Ил Дархан Айсен Николаев Дьокуускайдааҕы килиэп кэмбинээтигэр сырытта.
edersaas.ru
Киин куорат биир бөдөҥ стратегическай суолталаах тэрилтэтэ буоларын быһыытынан, Айсен Николаев тэрилтэ кондитерскай, килиэп сыахтарыгар, бурдук ыскылаатыгар сырытта.
— Сыстыганнаах ыарыы өрө турбут кэмигэр тэрилтэ үлэһиттэрэ Роспотребнадзор нормативын, хааччахтарын уонна өрөспүүбүлүкэтээҕи былаас уорганнарын ирдэбиллэрин барытын толороллор, — диэн Ил Дархан тэрилтэ сүрүн сыахтарыгар сылдьан баран, түмүккэ бэлиэтээн эттэ.
Бүгүҥҥү күҥҥэ үгүс аһатар уонна саататар тэрилтэ сабыллыбытынан сибээстээн, минньигэс аһы астааһын кээмэйэ аччаата. Бурдук саппааһа атырдьах ыйыгар диэри баар. Бу күннэргэ өссө эбии бурдук тиэйиллэн иһэр. Ол сапаас алтынньыга диэри тиийиэхтээх.
Бу өрөбүллэргэ христианнар Пасха бырааһынньыктара буоларынан сибээстээн, килиэп кэмбинээтэ куличтары астаан атыыга таһаарда.
Маны таһынан, килиэп кэмбинээтин үлэһиттэрэ элбэх оҕолоох уонна кыаммат ыалларга «көмө ас» (сухой паек) наборугар минньигэс ас көрүҥнэригэр сакааһы толордулар.
Елена ПОТОЦКАЯ, «Саха сирэ» хаһыат, edersaas.ru
Хартыскаҕа Андрей Сорокин түһэриитэ.