Ил Дархан Кыайыы 75-с сылыгар бэлэмнэниини тус хонтуруолугар ылла

Саха сирин баһылыга Айсен Николаев Арассыыйа байыаннай историятын бэлиэ түгэннэрин бэлэмнээн, тэрийэр, бэтэрээннэри социальнай өттүнэн көмүскээһининэн дьарыктанар “Кыайыы” тэрийэр кэмитиэти салайыаҕа. Өрөспүүбүлүкэ Ил Дархана маны сэргэ 1941-1945 сыллардааҕы Аҕа дойду Улуу сэриитигэр Кыайыы 75 сылын көрсө сотору кэминэн Саха сиригэр “Эһиги хорсун быһыыгыт көлүөнэлэр сүрэхтэригэр” Улуу Кыайыы сылын биллэрэр туһунан ыйаахха илии баттаары сылдьарын туһунан иһитиннэрдэ. Бу сыл 2019 сыл ыам ыйын 9 күнүттэн 2020 сыл ыам ыйын 9 күнүгэр диэри ыытыллыаҕа. 

“Халабырдьыт Германияны Улуу Кыайыы күнэ – дойдуга бүттүүнүгэр ытык бырааһынньык. Өрөспүүбүлүкэҕэ бырааһынньыгы уонна быйыл 74 сылы  уонна 2020 сылга Кыайыы 75 сылын хайдах  ыытарбытыттан Аҕа дойду Улуу сэриитин дьоруойдарын салгыы үйэтитии тутулуктаах. Биһиги дьоруойдар тустарынан өйдөбүнньүк Саха сирин билиҥҥи уонна кэлэр көлүөнэлэрин сүрэҕэр мэлдьи хааларын курдук бары кыаллары оҥоруохтаахпыт. Бу ытык дьыала мин тус хонтуруолбар баар”, — диэтэ өрөспүүбүлүкэ баһылыга  Айсен Николаев “Кыайыы” өрөспүүбүлүкэтээҕи тэрийэр кэмитиэт мунньаҕар кулун тутар 26 күнүгэр.

Ил Дархан министиэристибэлэргэ уонна биэдэмистибэлэргэ, ону тэҥэ муниципальнай тэриллиилэргэ Кыайыы 74-с уонна 75-с сылын бэлиэтээһини тутатына, соһо-сыһа сылдьыбакка быһааралларыгар сорудахтаата. Тыын боппуруостары быһаарыы – сэрии кыттыылаахтарын уонна бэтэрээннэрин мэдиссиинэнэн хааччыйыы, Кыайыы күнүгэр биир кэмнээх төлөбүр, олорор дьиэ усулуобуйатын тупсарыы туох да харгыһа суох оҥоһуллуохтаах.

Ураты болҕомтону өйдөбүнньүк пааматынньыктары өрөмүөннээһиҥҥэ, эбийиэктэри уонна болуоссаттары саҥардан оҥорууга ууруллуохтаах. Өрөмүөн үлэтэ бу сайыҥҥы сезоҥҥа ыытыллыахтаах, диэтэ баһылык. Маны сэргэ Саха сирин лидерэ өрөспүүбүлүкэ олохтоохторуттан уонна тэрилтэлэриттэн “Кыайыы” өрөспүүбүлүкэтээҕи фондатыгар босхо көмөнү хомуйуу үлэтин саҕалааһын дьоһун суолталааҕын бэлиэтээтэ.

Үлэ уонна социальнай көмүскэл миниистирэ Елена Волкова этэринэн,  Кыайыы 75-с сылын бэлиэтээһини тэрийии уонна ыытыынан ыам ыйын 1 күнүттэн ыам ыйын 10 күнүгэр диэри өрөспүүбүлүкэ сиригэр-уотугар бэтэрээннэр уонна кинилэри арыаллаан сылдьааччылар тырааныспар бары көрүҥэр (такситтан уратыга) босхо айанныыллара эбиллэн биэрдэ. Маны сэргэ ыччат тэрилтэлэриттэн, уопсастыбаннай түмсүүлэртэн, оскуола оҕолорун иллэҥ кэмнэригэр волонтердары бэтэрээннэргэ социальнай көмөнү оҥорууга сыһыарарга этилиннэ.

Биэдэмистибэ чахчытынан, 2019 сыл тохсунньу 1 күнүгэр Аҕа дойду Улуу сэриитин бэтэрээннэрин ахсаана – 6820, ити иһигэр 1941-1945 сыллардааҕы Аҕа дойду Улуу сэриитин инбэлииттэрэ уонна кыттыылаахтара – 111 киһи, тыыл бэтэрээнэ – 5462 киһи.

Саха сирин сэрии, үлэ, Сэбилэниилээх күүстэрин уонна быраабы араҥаччылыыр уорганнарын  бэтэрээннэрин бэрэссэдээтэлэ Вильям Иванов волонтердарга бэриллэр грант нөҥүө бэтэрээннэргэ сиделкалар уонна патронатнай сиэстэрэлэр саҥа институттарын тэрийэр туһунан боппуруоһу туруорда.

Бочуоттаах бэрэссэдээтэл, Сэрии бэтэрээннэрин уопсастыбаннай тэрилтэтин президиумун чилиэнэ Будимир Слепцов бэтэрээннэри мэдиссиинэнэн хааччыйыыны тупсарарга эттэ. Кини Айсен Николаевка “Кыайыы” тэрийэр кэмитиэти тус бэйэтинэн салайар буолбутугар махтанна.

Санатан эттэххэ, Арассыыйа Федерациятын Бэрэсидьиэнэ Владимир Путин 2018 сыл ыам ыйын 9 күнүгэр “1941-1945 сыллардааҕы Аҕа дойду Улуу сэриитигэр Кыайыы 75-с сылын бырааһынньыктааһыҥҥа бэлэмнэнии уонна ыытар туһунан” Ыйаахха илии баттаабыта.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата