Ил Дархан күһүҥҥү тумуу кэмигэр ковиды утары үлэ бастакы соруктарын туруорда
Өрөспүүбүлүкэҕэ коронавирус дьаҥынан сибээстээн, санитарнай-эпидемиологическай быһыы-майгы биир кэм тыҥааһыннаах.
edersaas.ru
Күн бүгүҥҥү туругунан, бу дьаҥҥа 144 киһи, ол иһигэр Дьокуускайга 80 киһи ыалдьыбыта билиннэ диэн Айсен Николаев улуустар баһылыктара кыттыылаах суһал ыстаап мунньаҕар эттэ. Бигэргэммит чахчынан, Саха сирэ дьаҥ сууккаҕа тарҕаныытынан Арассыыйа субьектарыгар 40-50-с миэстэҕэ сылдьар эбит. Ыалдьыбыт киһи ахсаана элбээһинэ Бүлүү, Горнай, Уус Маайа, Хаҥалас улуустарыгар бэлиэтэнэр. Дьокуускайга уонна 14 улууска реанимацияҕа 102 пациент сытарыттан 21 киһи ыарахан туруктаах буолан, салгыны искусственнайдык хачайдыыр аппаракка холбоммут.
Айсен Николаев улуустар баһылыктара ойуур баһаарынан уонна оттооһунунан сибээстээн, ковиды утары охсуһууну кэнники күөҥҥэ туппуттарын бэлиэтээтэ уонна күһүҥҥү тумуу кэмигэр COVID-19 ыарыы тарҕаныытын таһаарбат соругу туруорда. Онуоха сэрэтии дьаһалларын таһынан, дьону кытары үлэни күүһүрдэргэ, тумуу кыра бэлиэтэ баар буолла да, балыыһаҕа барары киһи барыта өйдүүрүн ситиһэргэ этэ. Ити коронавирус инфекциятын кэмигэр быһааран, ыарыы тарҕаныытын бохсуоҕа диэн, баһылыктар эмчитттэри кытары бииргэ үлэлииллэригэр сорудахтаата. Улуустар баһылыктара коронавирустан сэрэтэр даһаллартан саҕалаан, эминэн хааччыйыыга тиийэ миэстэҕэ үлэни сүрүннүөх тустаахтар. Ити иһин суолу өрүсүһэн наадалаах эминэн хааччыллыыны тэрийиэхтээхтэр.
Иккис сүрүн соругунан детсадтарга уонна оскуолаларга санитарнай-эпидемиологическай ирдэбиллэри тутуһууну хонтуруоллааһын буолар. Онуоха оҕолор уонна педагогтар, үлэһиттэр доруобуйаларын туругун мэлдьи көрөр-истэр, ыарыы түбэлтэҕэ таҕыста да суһал дьаһаллары ылар ирдэнэр. Температурнай эрэсиим хонтуруолланыахтаах, социальнай тэрилтэлэри уонна олорор дьиэлэри сылытыы боппуруоһа хойутуо суохтаах. Биир кэлим быыбар күнэ чугаһаан иһэринэн, быыбардыыр учаастактарга санитарнай-эпидемиологическай куттал суох буолуута хааччыллыахтаах.
Вакцинация туһунан этэригэр Айсен Николаев бастакы компонены 326 318 киһи, иккис компонены 302 168 киһи ылбытын эттэ. Улуустарынан көрдөрүү араастаһар, Үөһээ Халыма, Эдьигээн, Муома, Аллараа Халыма, Орто Халыма улуустарыгар былаан 90-100 % толоруллубут. Оттон Нам, Чурапчы улуустарыгар 60 % да толоруллубатах. Былааны 65 % Амма, Булуҥ, Үөһээ Бүлүү, Кэбээйи, Нерюнгрин уонна Уус Алдан улуустара толорбуттар. Вакцина толору куурсун алта ыйдааҕыта ылбыт 5305 киһи ревакцинацияламмыт. Бу сыыппара өссө үрдэтиллэн иһиэхтээх.
Мунньахха Өлүөхүмэ, Мирнэй уонна Хаҥалас улуустарын баһылыктара санитарнай-эпидемиологическай быһыы-майгы туругун уонна ыарыыны бохсуу дьаһалларын хайдах тэрийэллэрин туһунан кэпсээтилэр диэн Ил Дархан уонна Бырабыыталыстыба пресс-сулууспата иһитиннэрэр.
Раиса Сибирякова, «Саха сирэ» хаһыат, edersaas.ru
Мария Васильева хаартыскаҕа түһэриитэ.