Ил Дархан Интеллектуальнай оонньууларга кыттыахтаах оҕолору кытта көрүстэ
Бүгүн Өрөспүүбүлүкэ сүрүн саалатыгар Ил Дархан Егор Борисов Норуоттар икки ардыларынааҕы Интеллектуальнай оонньууларга кыттыахтаах, суруналыыс быһыытынан бэйэлэрин холонон көрүөхтээх оскуола оҕолорун кытта көрүстэ.
Интеллектуальнай оонньууларга диэри лоп курдук 100 хонук хаалла. Онон сибээстээн, Ил Дархан оҕолор санааларын иһиттэ, ыйытыыларыгар хоруйдаата, бэйэтэ ыйытыы биэрдэ.
Тэрээһин саҕаланыытыгар Егор Борисов:“Өйдүүр инигит, 2016 сыллаахха “Азия оҕолоро” норуоттар икки ардыларынааҕы спортивнай оонньууларбытын Монголияҕа атаарбыппыт. 2020 сылга Улан Батор куоракка ыытыллыаҕа. Бу Оонньуулар кинилэргэ улахан суолталааҕын, бэлэмнэнии саҕаламмытын этэллэр. “Азия оҕолорун” атаарарбытыгар 2018 сылга Интеллектуальнай оонньуулары тэрийиэхпит диэн эппиппит. Тоҕо диэтэххэ, спорт диэн биир хайысха, өй үлэтэ атын хайысха. Биһиги оҕолорбут спорка эрэ буолбакка, интеллектуальнай эйгэҕэ эмиэ үрдүк ситиһиилээх буолуохтаахтар. Биһиги оонньууну тэрийэргэ бэлэммит. Эһиэхэ улаханнык эрэнэбит”, — диэн эттэ.
“Кэскил” оҕо бэчээтин кыһатын дириэктэрэ Анжелика Андреева Интеллектуальнай оонньуулар чэрчилэринэн мультимедийнай оскуола үлэлиэҕин, бэлэмнэнии ааспыт сайын СӨ Наукаларын Аччыгый академиятын баазатыгар саҕаламмытын кэпсээтэ. Саха сирин араас муннуктарыттан 28 оҕо үөрэҕи ааспыт. Итинтэн 18 оҕо ахсынньыга Москваҕа Арассыыйатааҕы судаарыстыбаннай университет уонна норуоттар икки ардыларынааҕы пресс-киин баазатыгар баран үөрэнэн кэлбиттэр. Бу күннэргэ СӨ Наукаларын Аччыгый академиятыгар англо-мультимедийнай оскуола үлэтин түмүктээбит.
Оҕолор бэлэмнэниини хайдах ааспыттарын туһунан санааларын үллэһиннилэр. Аҕыйах күн иһигэр англия тылыгар тестированиены ааспыттар, суруналыыстыка терминологиятын үөрэппиттэр, хаартыскаҕа түһэриигэ маастар-кылаас ылбыттар, суруналыыстыка жанрдарын билсибиттэр, о.д.а. бэлэмнэниини барбыттар.
Оттон Саха сиригэр аан маҥнайгытын тэриллэр Интеллектуальнай оонньууларга кыттыахтаах, бүтүн өрөспүүбүлүкэ, Арассыыйа аатын ааттатыахтаах, историяҕа киириэхтээх оҕолор бэйэлэрин чинчийиилэрин, ситиһиилэрин билиһиннэрдилэр.
Салгыы оҕолорго Ил Дархан Егор Борисовка интэриэһиргиир ыйытыыларын биэрдилэр. Бэйи, кыраларын көрүмэ, оскуолаҕа үөрэнэллэр диэн мыыныма. Бэйэлэрин саастарыгар бэрт дириҥ хорутуулаах, киэҥ билиилээх оҕолор бааллар эбит. Ол курдук, холобура, Интеллектуальнай оонньуулар хастыы сыл буола-буола ыытыллыахтарын, норуоттар икки ардыларынааҕы сыһыаннаһыыга дьайыытын, Саха сиринээҕи бастакы научнай экспедиция, Арассыыйа атын субъектарын кытта тэҥнээтэххэ, Саха сиригэр үөрэх, билии ханнык таһымҥа турарын туһунан ыйыталаһан, бэрт ырааҕы толкуйдуулларын көрдөрдүлэр.
Түмүккэ Егор Борисов оҕолор саамай көнөлөрүн, аһаҕастарын, кырдьыгы хайдах баарынан кэпсииллэрин бэлиэтээтэ, махтанна. Интеллектуальнай оонньууларга ситиһиилэри баҕарда.
Людмила ПОПОВА, “Саха сирэ” хаһыат, edersaas.ru
Мария ВАСИЛЬЕВА (СИА) хаартыскаҕа түһэриилэрэ.