Бүгүн СӨ Судаарыстыбаннай Мунньаҕын (Ил Түмэн) 21-с уочараттаах пленарнай мунньаҕар 22 боппуруоһу көрөллөр.
edersaas.ru
Ол иһигэр Ил Дархан Андрея Тарасенконы бырабыыталыстыба бэрэссэдээтэлинэн аныырга сөбүлэҥнэрин биэрии туһунан боппуруоһу. Айсен Николаев Ил Түмэҥҥэ Тарасенко кандидатуратын билиһиннэрдэ.
Кэпсэтии, дьүүллэһии кэнниттэн норуодунай дьокутааттар Андрей Тарасенко кандидатуратын кистэлэҥ куоластааһын бүлүтүөнүгэр киллэрэр туһунан быһаардылар. Түмүк куоластары ааҕыы кэнниттэн биллиэҕэ.
Санатан эттэххэ, СӨ бырабыыталыстыбатын бэрэссэдээтэлин эбээһинэһин толорооччунан Андрей Тарасенконы от ыйын 31 күнүттэн үлэлиир.
Андрей Тарасенко бу иннинэ Муора уонна өрүс тырааныспарын Федеральнай агентствотын салайааччытын солбуйааччытынан үлэлээбитэ.
ЫСПЫРААПКА:
Андрей Тарасенко 1963 сыллаахха атырдьах ыйын 9 күнүгэр Владивосток куоракка төрөөбүтэ.
1985 сыллаахха Ленинград куоракка Ленинскэй хомсомуол аатынан үрдүкү байыаннай-муора училищетын бүтэрбитэ.
1997 — 2005 сс. балыгы бултуур салаа судаарыстыбаннай тэрилтэлэригэр уонна хампаанньаларыгар салайар дуоһунастарга үлэлээбитэ.
2005 сыллаахха айылҕаны туһаныыга уонна агропромышленнай тиһиккэ федеральнай үбү-харчыны ороскуоттааһыны хонтуруоллуур иниспиэксийэтин начаалынньыгын солбуйааччыта.
2007 сыллаахха Атомнай энергия Федеральнай агентствотын административнай хааччыйыыга уонна дьыалаларыгар управлениетын начаалынньыгын солбуйааччы. Салгыы «Росатом» ГК баайга-дуолга департаменын дириэктэрин солбуйааччы.
2010 — 2012 сс. «Россельхозбаан» ААУо кылаабынай экэнэмииһинэн, онтон баан бырабылыанньатын бэрэccэдээтэлин сүбэһитинэн үлэлээбитэ.
2012 сыл кулун тутарыттан 2013 сыл бэс ыйыгар диэри Уу ресурсаларын федеральнай агентствотын Невско-Ладожскайдааҕы бассейновай управлениетын салайааччытын солбуйааччытынан, онтон салайааччытынан үлэлээбитэ.
2013 сылтан «Росморпорт» ФГУП салайааччыта.
2017 сыл алтынньы 4 күнүттэн 2018 сыл балаҕан ыйын 26 күнүгэр диэри Приморскай кыраай губернаторын эбээһинэһин толорооччу.
2018 сыл балаҕан ыйын 27 күнүттэн РФ Бырабыыталыстыбатын дьаһалынан Муора уонна өрүс тырааныспарын салайааччытын солбуйааччытынан анаммыта.
