СӨ Ил Дархана Айсен Николаев социальнай ситимнэринэн быһа сибээскэ тахсан, нэһилиэнньэ ыйытыытыгар хоруйдаата.
edersaas.ru
Ил Дархан быһа сибээһин дьону-сэргэни ордук долгутар хамсык дьаҥын туһунан иһитиннэрииттэн саҕалаата. Кэлиҥҥи сууккаҕа 203 киһи ыарыыга хаптарбыта. Бырыаһынан ылан көрдөххө, куоракка олорор дьон хамсыгынан ыалдьыытын ахсаана кыччаан иһэрин этэр. Ол оннугар, улуус олохтоохторо ыалдьан эрэллэр диэн бэлиэтиир.
Биллэн турар, доруобуйа харыстабылыгар сүктэриллибит ноҕорууска олус улаханын, хамсык иккис долгунугар элбэх киһи ыалдьыбытын бэлиэтиир.
“Маныаха эмтээһин хаачыстыбатын, иллэҥ куойкалары тэрийиигэ, эминэн хааччыйыыга, анаалистары ылыыны тэрийиигэ өрөспүүбүлүкэ дойду эрэгийиэннэрин кэккэтигэр көрдөрүүтэ куһаҕана суох. 100 тыһыынча нэһилиэнньэҕэ анаалыс ылыытыгар биһиги букатын даҕаны дойдуга лидердэрбит. Ону кытта, биллэн турар, кэккэ боппуруостар бааллар. Бу — анаалыстары уһуннук оҥоруу. Өскөтүн, Дьокуускайга балаһыанньа син оннун булан эрэр эбит буоллаҕына, хоту улуустарга балаһыанньа судургута суох. Бүгүн олоччу ИФА уонна ИХА анаалыстарга көһөргө сорудахтаатым. Онтон ПЦР анаалыһы хамсык бигэргэммит эрэ буоллаҕына оҥорорго эттим. Бу ыарыы саҕаланыыта дьону эмтииргэ бириэмэни сүүйүөҕэ”, — диэтэ.
Людмила ПОПОВА, “Саха сирэ” хаһыат, edersaas.ru