Өрөспүүбүлүкэ араас муннуктарыттан үөрэхтэригэр, араас көрүҥнэргэ ситиһиилээх, ураты көрдөрүүлээх үрдүкү кылаас 700 үөрэнээччитэ сыллата Ил Дархан харыйатыгар мустар. Быйыл даҕаны бу үтүө үгэс кэһиллибэт. Ол курдук, Ил Дархан Айсен Николаев харыйата быйыл ахсынньы 23 күнүгэр буолуоҕа.
edersaas.ru
Быйылгы тэрээһин эмиэ Саха Цииркэтин киэҥ уораҕайыгар ыытыллыаҕа. Бырааһынньыктааҕы көрдөрүү тиэмэтэ – Г.Х.Андерсен “Снежная королева” остуоруйата. Харыйаҕа кэлэр оҕолор остуоруйаны бэйэтин ааҕан, туруоруу кинигэҕэ суруллубуттан туох уратылааҕын тэҥнээн көрүөхтэрин сөп.
Оҕолор аҥаардас биир эрэ тэрээһининэн муҥурдамматтар. Ол курдук, СӨ Үөрэҕин уонна наукатын пресс-сулууспата иһитиннэрэринэн, М.К.Аммосов аатынан Хотугулуу-Илиҥҥи федеральнай университекка, Искусство уонна култуура Арктикатааҕы судаарыстыбаннай институтугар, Саха судаарыстыбаннай тыа хаһаайыстыбатын академиятыгар идэлэрин талалларыгар сирдиир, сүбэлиир, билиһиннэрэр ис хоһоонноох көрсүһүүлэргэ кыттыахтара.
Итиэннэ “Кванториумҥа”, “Арассыыйа – мин историям” история пааркатыгар, киинэ тыйаатырыгар сылдьыахтара. Араас түмэллэри, классическай муусука кэнсиэрдэрин даҕаны тумнуохтара суоҕа. Итинтэн көстөрүнэн, бырагыраамалара киэҥ.
Оттон бэлэх быһыытынан ыҥырыылаах оҕолорго барыларыгар 25 тыһ. солк. биирдэ көрүллэр истипиэндьийэ бэриллиэҕэ.
Людмила ПОПОВА, “Саха сирэ” хаһыат, edersaas.ru
Мария ВАСИЛЬЕВА (СИА) хаартыскаҕа түһэриилэрэ.