СӨ Ил Дархана сыллата ыытар харыйатыгар ыҥырыллыбыт үөрэнээччилэр бастакы дэлэгээссийэлэрэ кэллэ. Бу күннэргэ “Бэс Чагда” кииҥҥэ Арктика оройуоннарыттан үөрэнээччилэр кэлэн түстүлэр.
Быйыл Саха сирин 23 оройуонуттан кииҥҥэ 300 кыттааччы олоруоҕа. Сыл улахан тэрээһинигэр өрөспүүбүлүкэттэн, уопсайа, 700 оҕо кыттыаҕа. Кинилэр – туйгун үөрэнээччилэр, көхтөөх кыттааччылар, араас олимпиадалар, спортивнай күрэхтэһиилэр кыайыылаахтара.
“Мин элбэх куонкурустарга, математикаҕа уонна нуучча тылыгар өрөспүүбүлүкэтээҕи уонна Бүтүн Арассыыйатааҕы олимпиадаларга кыттабын. Ил Дархан харыйатыгар кэлэр үрдүк чиэскэ тиксибиппиттэн үөрэбин. Истипиэндьийэбин үөрэхпэр туһаныаҕым. Инникитин олохпун IT-эйгэни кытта ситимниэхпин баҕарабын. Дизайнер дуу, программист дуу, эбэтэр “разработчик” дуу буолуом. Ил Дархан харыйатыгар сылдьыы – улахан ситиһии. Бэйэм саастыылаахтарбар дьулууру, хаһан да, туох да харгыска бэриммэккэ соруктарын толороллоругар баҕарабын”, — диэн Булуҥ улууһун Хоруулаах оскуолатын 11-с кылааһын үөрэнээччитэ Кирилл Слепцов кэпсиир.
“Оскуолабыт иһинэн үлэлиир “Кэскил” көхтөөх кыттааччытабын. Онно биһиги оскуола араас тэрээһиннэрин ыытабыт. Мэдиссиинэ хайысхатыгар туттарсар баҕалаахпын”, — диэн Өлөөн улууһун Эйик оскуолатын үөрэнээччитэ Александрия Сергеева санаатын үллэстэр.
Ил Дархан быйылгы харыйата ахсынньы 23 күнүгэр СӨ Судаарыстыбаннай цииркэтигэр буолуоҕа. Бары кыттааччыларга 25 тыһыынча солкуобай суумалаах СӨ Ил Дарханын истипиэндьийэтэ туттарыллыаҕа. Тэрээһин иитинэн араас култуурунай бырагыраама былааннанар. Ол курдук, оҕолор үөрэх тэрилтэлэринэн, киинэ тыйаатырдарынан, тыйаатырдарынан, түмэллэринэн сылдьыахтара, өрөспүүбүлүкэ биллиилээх бэлиитиктэрин, спортсменнары уонна уопсастыбаннай диэйэтэллэри кытта көрсүөхтэрэ.
СӨ Үөрэҕин уонна наукатын пресс-сулууспата.