Ил Дархан хамсыкка сыһыаннаах ыйытыыларга хоруйдара

Ааптар: 
06.11.2020
Бөлөххө киир:

Бүгүн киэһэ СӨ Ил Дархана Айсен Николаев социальнай ситимнэринэн быһа сибээскэ тахсан, нэһилиэнньэ ыйытыытыгар хоруйдаата.

edersaas.ru

  1. Ыйытыы: Аптекаларга эмп сыаната тоҕо үрдүү турарый?

Ил Дархан: Эппитим курдук, бүгүн Росздравнадзорга уонна Госкомцен тэрилтэҕэ эмп сыанатын хонтуруоллуулларыгар сорудах биэрдим. Сыана аттынааҕы аптеканы кытта икки бүк араастаһыыта суох буолуохтаах. Хомойуох иһин, бүгүн ити курдук көстүү тахсар.

  1. Ыйытыы: Учаастактааҕы быраастар ыарыһахха кэлиилэрэ тоҕо бытааный?

Ил Дархан: Билиҥҥитэ учаастактааҕы терапевтар олус ноҕоруускалаахтык үлэлииллэр. Күҥҥэ 60-80 ыарыһахха сылдьаллар. Кинилэр бэйэлэрэ эмиэ ыалдьыахтарын сөп. Маныаха, үлэлии сылдьар дьону өйдөөн, арыый тулуурдаахтык сыһыаннаһар наада. Ыҥырыыга сарсыныгар тиийэллэрэ, билиҥҥи курдук усулуобуйаҕа нуорма буолар.

Бүгүн куорат балыыһаларыгар эрийэн тиийэр уустуктардаах. Бэҕэһээ уонна бүгүн анал дьон тустаах боппуруоһунан дьарыктаннылар. Ыйыллыбыт доруобуйа харыстабылын тэрилтэтигэр төһө бириэмэ иһинэн эрийэн тиийиэххэ сөбүн көрдүлэр. Түмүк оҥоһулунна. Бүгүн балыыһаларга сорудах биэрдим. Сорох балыыһаларга олус түргэнник төлөпүөннээн тиийиллэр, хомойуох иһин, сорохторго букатын кыайан тиийиллибэт.

3. Ыйытыы: Уһуйааннар, оскуолалар үлэлииллэр дуо?

Ил Дархан: Бүгүн суһал ыстаап мунньаҕар куорат мээрэ Сардаана Авксентьева иһитиннэрбитинэн, куоракка биир даҕаны уһуйаан бөлөҕө хамсыктан сылтаан сабыллыбыта бэлиэтэммэтэх. ОРВИнан, оннооҕор скарлатинанан сибээстээн сабыллыбыт бөлөхтөр бааллар. Оттон чопчу хамсыгынан сибээстээн сабыллыбыт бөлөх куоракка суох.

Оскуолалар үлэлииллэр дуо, диэн эмиэ үгүс ыйытыы киирэр. Хас биирдии улуус, куорат уокуруга балаһыанньаттан тутулуктанан ханнык көрүҥү туһанан үөрэтэрин бэйэтэ быһаарар. Сорох нэһилиэктэргэ ыарыы букатын бэлиэтэнэ илик. Ол нэһилиэк оҕолоро тоҕо оскуолаҕа үөрэниэхтэрэ суоҕай?

4.Ыйытыы: Босхо эминэн хаһааҥҥыттан хааччыйыахтарай?

Ил Дархан: Амбулаторнай эмтэниигэ федеральнай быһаарыы ылыллыбыта, үбүлээһин киирэр. Эми 65-тэн үөһэ саастаахтарга уонна хроническай ыарыылаахтарга бэриллиэхтээх. Бүгүн кылаабынай быраастар быһаарыы ылыллан эрэр диэн иһитиннэрдилэр.

5.Ыйытыы: Хамсыгынан ыалдьыбыттар ханна реабилитацияланалларый?

Ил Дархан: Дьоһуннаах ыйытыы. Хамсык доруобуйаҕа сыыстарыыны үөскэтэрэ элбэх. Билигин номнуо чөлүгэр түһэрии туһунан толкуйдуохтаахпыт.  Күн бүгүн Абалаахха (Мэҥэ Хаҥалас) 100-тэн тахса киһи бөҕөргөтүннэ. “Бэс Чагда” санаторийга хамсыкка хаптарбыт дьон реабилитацияны ааһалларын курдук сорудах биэрдим. Дьокуускай куоракка эмиэ чопчу санаторий аныахпыт.

6. Ыйытыы: Өрөспүүбүлүкэ уонна улуус суһал ыстаабын сыыппаралара тоҕо араастаһалларый? Кимиэхэ итэҕэйэбит?

Ил Дархан: Роспотребнадзор бүтэһиктээх бигэргэтэр анаалыһы таһаарыан иннинэ, улуустар мэлдьи барыллаан сыыппараны биэрэллэр. Дьиҥэр, бигэргэтии биир-икки күнүнэн буолбакка, нэдиэлэнэн оҥоһуллар. Ол иһин түмүк улахан уратылаах буолар.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0