Бүгүн былаанныыр мунньахха Ил Дархан Айсен Николаев бырабыыталыстыба иннигэр бастакы уочараттаах соруктары туруорда.
Ол курдук, халааҥҥа баайа-дуола эмсэҕэлээбит дьоҥҥо көмөнү оҥоруу, хамнас индексацията, социальнай төлөбүр уонна да атын быһаарыыны эрэйэр боппуруостар сүрүн тиэмэнэн буоллулар.
РФ Бэрэсидьиэнэ Владимир Путин сорудаҕынан бэс ыйыттан дойдуга прожиточнай минимум 10% индексацияланыахтаах. От ыйын 1 күнүттэн үлэ төлөбүрүн алын кээмэйэ — 10%, үлэлээбэт биэнсийэлээх дьон биэнсийэлэрэ 10% үрдүөхтээх. Эрэгийиэн таһымыгар индексация кэмигэр оҥоһулларын курдук тустаах докумуоннар бэлэм буолуохтаахтар.
Маны таһынан, Ил Дархан халаан таһаарбыт хоромньутун ааҕыыны-суоттааһыны түргэтэтэр наадатын ыйда. Бу күннэргэ улуустарга хоромньу тахсыытыгар анал хамыыһыйалар үлэлии сылдьаллар. “Дьоҥҥо тустаах көмө оҥоһулла охсуон наада”, — диэн бэлиэтээтэ Ил Дархан.
Айсен Николаев федеральнай таһымҥа оҥоһуллар өйөбүл миэрэлэрин кэҥэтэр наадатын санатта уонна хонтуруолга ыларга эттэ. Ил Дархан бу күннэргэ Национальнай уйгу пуондатыттан коммунальнай тиһик үбүлээһинигэр оҥоһуллубут сайаапка бигэргэммитин иһитиннэрдэ. Ол аата өрөспүүбүлүкэ 1,4 млрд солкуобайы ылан, ититии тиһигин үлэтин хаачыстыбатын тупсарыаҕа. Хаарбах дьиэлэртэн дьону көһөрүүгэ өрөспүүбүлүкэ 25,7 млрд солкуобайы ОДьКХ пуондатыттан ылыаҕа. 2023 сылга диэри 4 020 хаарбах туруктаах дьиэттэн 9 тыһыынчаттан тахса киһи көһөрүллүөҕэ. Саха сирэ 2022-2023 сылларга эбии 152 мөлүйүөн солкуобайы спортивнай эбийиэктэри тэрийиигэ ылыаҕа. Үбүлээһин «Бизнес-спринт» саҥа федеральнай бэрийиэк чэрчитинэн модульнай спортивнай саалалары уонна өйдөөх спортивнай былаһааккалары тэрийиигэ анаан тыырыллыаҕа.
Бу туһунан СӨ Аҕа баһылыгын уонна Бырабыыталыстыбатын пресс-сулууспата иһитиннэрдэ.
Елена ПОТОЦКАЯ, “Саха сирэ” хаһыат, edersaas.ru
Хаартыска — Андрей Сорокин (СИА).