Уопсастыба

Ил Дархан граныгар сайаапкалары тутуу саҕаланна

Ыам ыйын 23 күнүттэн Ил Дархан граныгар сайаапкалары тутуу саҕаланар. Ол туһунан Айсен Николаев иһитиннэрдэ.

edersaas.ru

2020 сыл муус устар 20 күнүгэр Ил Дархан гражданскай уопсастыбаны сайыннарыы туһунан ыйааҕа тахсыбыта.

Бу уустук кэмҥэ Ил Дархан граннара сүрүннээн кэмиэрчэскэйэ суох тэрилтэлэргэ өйөбүл буолуохтара. Ол иһин граннары биэриини “Ковид-19” пандемиятын кэмигэр Саха Өрөспүүбүлүкэтин экэниэмикэтэ туруктаах буолуутугар туһуламмыт тэрээһиннэр былааннарыгар киллэрдибит.

Ол курдук, грант үбүн быһаччы бырайыак ороскуотугар эрэ буолбакка, сорох чааһын куортамы, хамнаһы, командировка ороскуотун, нолуогу, страховой усунуостары, о.д.а. төлүүргэ туһаныахха сөп. Күрэскэ хаһан регистрацияламмыттарыттан тутулуга суох, бары социальнай хайысхалаах кэмиэрчэскэйэ суох тэрилтэлэр кыттар кыахтаахтар. Онон бу уларытыылар дьоҥҥо-сэргэҕэ көмөлөһөр, туһалаах бырайыактары олоххо киллэрэр кэмиэрчэскэйэ суох тэрилтэлэргэ уустук кэмҥэ көмөлөһүөхтэрэ диэн эрэнэбит, — диэн Айсен Сергеевич бэлиэтээтэ.

2020 сылга грант уопсай пуондата 56 мөлүйүөн солкуобайга тэҥнэһэр. Ыччат дьыалаларыгар, социальнай коммуникацияларга министиэристибэ быһаччы дьарыктанар. Күрэс One Сlick Yakutia портал нөҥүө ыытыллар, тутулуга суох эспиэрдэр кыайыылаахтары онлайн эрэсииминэн быһаараллар.

Өрөспүүбүлүкэ сайдыытын, дьон-сэргэ туһугар үлэлии-хамсыы сылдьар волонтердарга уонна уопсастыбанньыктарга улахан махталбын тиэрдиэхпин баҕарабын! Кэмиэрчэскэйэ суох тэрилтэлэр сайдыыны хамсатааччы, былаас уонна уопсастыба икки ардыларыгар эрэллээх муоста быһыытынан бэриниилээхтик үлэлииллэр. Ол иһин кинилэр идиэйэлэрин, саҕалааһыннарын өйөөһүн, бырайыактарын олоххо киллэрэллэригэр көмөлөһүү – биһиги иэспит, — диэн кини эттэ.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

0
0

Добавить комментарий