Олунньу 26 күнүгэр Саха сирин бырабыыталыстыбатын «Саха» НКиХ, «Якутия 24» ханаалларыгар уонна «Тэтим» араадьыйаҕа отчуотун кэмигэр өрөспүүбүлүкэ вице-премьерэ Ольга Балабкина Саха Өрөспүүбүлүкэтин Ил Дархана Айсен Николаев граннарыгар тохтоото.
edersaas.ru
Кини чуолаан социальнай хайысхалаах кэммиэрчэскэйэ суох тэрилтэлэр куонкурустарыгар Горнай улууһа куруук көхтөөхтүк кыттарын бэлиэтээтэ. Кинилэр Ил Дархан граныгар эрэ буолбакка, РФ бэрэсидьиэнин граннарын куонкуруһугар кыайаллар. Былырыын Горнай улууһуттан 41 сайаапка киирбитэ.
Өрөспүүбүлүкэ хотугу улуустарын уопсастыбаннай тэрилтэлэрэ граннарга эмиэ актыыбынайдык кытталлар.
2021 сыллаахха гражданскай уопсастыбаны сайыннарарга Саха сирин баһылыгын граннарын куонкуруһун кыайыылаахтарынан 80 социальнай хайысхалаах кэммиэрчэскэйэ суох тэрилтэ кыайбыта. Былырыын 341 тэрилтэттэн (29 муниципальнай оройуонтан уонна куорат икки уокуругуттан) 424 сайаапка киирбитэ.
Ольга Балабкина быһаарбытынан, куонкуруска киллэриллибит сайаапкалары араас эйгэттэн тутулуга суох идэлээх экспертэр сыаналыыллар. Манна даҕатан эттэххэ, Саха сирин Ил Дарханын граннарын ылыы куонкуруһугар регистрацияламмыт уонна өрөспүүбүлүкэ иһигэр үлэлиир социальнай хайысхалаах кэммиэрчэскэйэ суох тэрилтэлэр эрэ кытталлар.
БЫҺААРЫЫ:
Саха Өрөспүүбүлэкитигэр социальнай хайысхалаах кэммиэрчэскэйэ суох тэрилтэлэри судаарыстыба өйүүрүн туһунан СӨ сокуона 2014 сыллаахха ылыллыбыта.
2022 сыл саҥатыгар 1791 социальнай хайысхалаах кэммиэрчэскэйэ суох тэрилтэ регистрацияланна. Олортон 950-– улуустарга, 841 -– Дьокуускайга.
Надежда ЕГОРОВА, «Саха сирэ» хаһыат, edersaas.ru
Мария ВАСИЛЬЕВА (СИА) хаартыската