Ил Дархан граннарыгар 103,5 мөлүйүөн солкуобай бэриллиэҕэ. Ыам ыйын 9 күнүттэн бэс ыйын 7 күнүгэр диэри сайаапкалары биэриэххэ сөп. Ол туһунан ыччат миниистирэ Степан Саргыдаев пресс-кэмпириэнсийэҕэ иһитиннэрдэ.
Бу суума хаһааҥҥытааҕар да элбэх. Граҥҥа социальнай хайысхалаах кэмиэрчэскэйэ суох уопсастыбаннай тэрилтэлэр кыттар кыахтаахтар. Кинилэр көхтөөх буолан, 2019 сыл түмүгүнэн өрөспүүбүлүкэ гражданскай уопсастыба институтун өйүүр эрэгийиэннэргэ бастыҥнар истэригэр киирбитэ. Арассыыйаҕа 9-с, Уһук Илиҥҥэ 1-кы миэстэлээх.
Былырыын 16 хайысханан сайаапкалары хомуйбут эбит буоллахтарына, быйыл 25 хайысхалаах. Грант харчытын үлэһиттэр хамнастарыгар, нолуогу, атын төлөбүрдэри, усунуостары төлүүргэ, куортамҥа, тэрээһиннэри ыытарга, командировкаҕа, онтон да атын ороскуоттарга туһаныахха сөп. Грант сууматын сайаапканы биэрээччи бэйэтэ быһаарар.
Төрөөбүт тылы тарҕатарга, ыарахан балаһыанньаҕа түбэспит дьоҥҥо көмөлөһөргө, о.д.а. туһуламмыт саҥа хайысхалар киирэн биэрдилэр. Онон дьоҥҥо көмөлөһөр, уопсастыбаҕа туһалаах буолар баҕалаах, култуура, үгэс, тыл туһугар ыалдьар дьон кытаатыҥ!
— Былырыын 237 тэрилтэттэн 256 сайаапка киирбитэ. Онуоха 43 бырайыак кыайан, 56 мөлүйүөн солкуобай суумалаах өйөбүлү ылбыттара. Быйыл федеральнай бүддьүөттэн эбии үп көрүлүннэ, суумата икки төгүл улаатта, онон өссө элбэх сайаапка киирэригэр эрэнэбит, — диэн миниистир Степан Саргыдаев эттэ.
Хайысхалар уонна ирдэбиллэр тустарынан grants.yakutia.click саайтка киирэн ааҕыахха сөп. Холобур, биир эмэ хайысхаҕа сайаапка киирбэтэҕинэ, үп өрөспүүбүлүкэ бүддьүөтүгэр төннөр. Эбэтэр, 1 сайаапка киирбит буоллаҕына, кини кыайыылааҕынан ааттанар. Онтон хас да сайаапка киирбит буоллаҕына, саамай элбэх баалы ылбыт кыайар. Баал тэҥнэһэр түгэнигэр, бастакынан сайаапка биэрбит тэрилтэҕэ биэрэллэр. Онон уһаппакка-тэниппэккэ, эрдэ биэрэр ордук. Биир бырайыагы 2 эспиэр көрөн, ырытар.
Грант куонкуруһун түмүгэ атырдьах ыйын 20 күнүгэр тахсар, харчыта балаҕан ыйын 1 күнүгэр диэри түһэр. Балаҕан ыйын 1 күнүттэн бырайыак үлэлээн барыахтаах уонна 1 сыл салҕаныахтаах.
Ангелина Васильева, “Саха сирэ” хаһыат, edersaas.ru
Хаартыска: СИА.