Атырдьах ыйыгар 50 социальнай хайысхалаах, кэмиэрчэскэйэ суох түмсүүлэр грант көмөтүн ылбыттара. Кинилэртэн 7 түмсүү РФ Бэрэсидьиэнин пуондатын куонкуруһугар кыайбыта, 43 түмсүү – Ил Дархан граннарын куонкуруһугар. Кыайыылаахтары Айсен Николаев эҕэрдэлээтэ.
Бу көрсүһүү онлайн көрүҥүнэн буолла. Ил Дархан уопсастыбанньыктары кыайыыларынан эҕэрдэлээтэ, олоххо көхтөөх быһыыларын, тэрийэр үлэлэрин иһин махтанна.
— Эһиги ситиһиигит Саха сирин гражданскай уопсастыбата көхтөөҕүн көрдөрөр, дьон туһугар үлэлиир, айар-тутар актыбыыстар баалларын биллэрэр. Күүскүтүн-уоххутун харыстаабакка, бириэмэҕитин, сыраҕытын дьон туһугар аныыргытын иһин махталбын биллэрэбин. Уопсастыбаннай түмсүүлэр өрүү да олоҕу хамсатар күүс, сайдыы олуга, былааһы уонна уопсастыбаны ситимниир эрэллээх муоста буолаллар. Онон эһиги саҕалааһыннаргытын, идиэйэлэргитин өйүөх тустаахпыт. Граннар билиҥҥи уустук кэмҥэ эһиги дьыалаҕытыгар көмөлөөх буолуохтара диэн эрэнэбин, — диэн кини эттэ.
Видеокэмпириэнсийэҕэ Бэрэсидьиэн граннарын пуондатын генеральнай дириэктэрин солбуйааччы Иннокентий Дементьев холбоно сырытта. Кини бырайыактар сытыы кыһалҕалары быһаарар хайысхалаахтарын, дьоҥҥо үтүө дьыалалары оҥороллорун бэлиэтээтэ.
— Эһиги эрэгийиэҥҥитититтэн сайаапка ахсаана элбээн иһэрин көрөбүт, ону тэҥэ, бырайыактар хаачыстыбалара, ис тутуллара тупсан, сайдан иһэр. Дьокуускайтан эрэ буолбакка, оройуоннартан эмиэ кытталлара үөрдэр. Саха сирэ гражданскай уопсастыбаны өйүүр куонкурустары ыытарга бэйэтэ туспа порталлаах 5 эрэгийиэн иһигэр киирэр. Салайааччыттан улахан тутулуктаах, онон Айсен Сергеевичкэ махтаныахха наада. Туһалаах, үтүө дьыалалары олоххо киллэрэргэ ситиһиилэри баҕарабын. Биһиги өйүүргэ бэлэммит, — диэн кини эттэ.
Гемодиализтаах ыарыһахтары өйүүр “Инникигэ эрэл” диэн бырайыактаах Наталья Каратаева Социальнай хайысхалаах кэмиэрчэскэйэ суох түмсүүлэри өйүүр Ресурснай кииҥҥэ махтанарын биллэрдэ. Бу киин грант суруйуон баҕалаах дьоҥҥо быһаччы көмөлөһөр.
Бэрэсидьиэн граннарын пуондата ыытар куонкуруһун бастакы түһүмэҕин түмүгэ атырдьах ыйын 28 күнүгэр тахсыбыта. Дойду үрдүнэн 3868 сайаапка киирбититтэн, 900 бырайыак кыайбыт. Саха сириттэн 56 бырайыак кыттыбытыттан, 7-тэ кыайбыт.
Ол курдук, Чурапчы улууһуттан Оҕолору сайыннарар, өйүүр уопсастыбаннай түмсүү, Волонтердары кытта үлэлиир киин, Кэбээйитээҕи оройуоннай киин балыыһа, Чааһынай мэдиссиинэ кииннэрин, килииникэлэрин ассоциацията, Дьокуускайдааҕы Нуучча православнай таҥара дьиэтин епархията, “Семья для ребенка” пуонда, Светлана Николаева аатынан “Сырдык ыра” социальнай пуондата кыайдылар. Кинилэр уопсайа 14 мөлүйүөн солкуобайы ылыахтара.
Ил Дархан гранын куонкуруһун түмүктэрэ атырдьах ыйын 3 күнүгэр биллибитэ. 16 хайысханан 237 сайаапка киирбитэ. Балартан 43 бырайыак 56 мөлүйүөн суумалаах граны ылла диэн СӨ бырабыыталыстыбатын, баһылыгын дьаһалтатын пресс-сулууспата иһитиннэрэр.
Ангелина Васильева, “Саха сирэ” хаһыат, edersaas.ru
Хаартыска: Sakhagov.ru