Айылҕа харыстабыла

Ил Дархан Горнай, Таатта, Сунтаар улуустарын кытта мунньахтаата  

Ил Дархан Айсен Николаев Горнай, Таатта, Сунтаар улуустарын кытары бүгүн быһа сибээһинэн ойуур баһаарын умулларыыга мунньах ыытта.

Горнай улууһун Күөрэлээҕэр бэҕэһээ уот нэһилиэнньэлээх пууҥҥа 1,5 км чугаһаан кутталы үөскэтэ сылдьыбыта. Баһылык Алексей Петров иһитиннэрбитинэн, бэҕэһээ баһаар инники кэккэтин умулларбыттар эрээри, бүгүн уот ойууру үрдүнэн көтөн айан суолугар чугаһаабыт. Билиҥҥи туругунан, баһаары умулларыыга 153 киһи, ону сэргэ хас да тиэхиньикэ үлэлии сылдьар. Горнай улууһун баһылыга Никита Андреев Күөрэлээҕи таһынан Одуну нэһилиэгэр хас да сиринэн ойуур баһаара турбутунан “Циклон” АН-26 сөмөлүөт былыттары хамсатан ардаҕы түһэрэргэ үлэлиирин эттэ.

Таатта улууһун баһылыга Михаил Соров иһитиннэрбитинэн, билигин ойуур баһаардарыгар 121 киһи, 23 техника үлэлии сылдьар. Кини кураан уонна тыаллаах буолан, уот түргэнник тарҕанан баһаар иэнэ күн аайы улаатан иһэрин бэлиэтээн туран, уу кутар анал бөртөлүөтү Таатта улууһугар ыытарга эттэ.

Оттон Сунтаар улууһугар, бүгүҥҥү туругунан, үс сиринэн ойуур баһаара бара турар. Улуус баһылыгын бастакы солбуйааччы Николай Александров иһитиннэрбитинэн, билигин нэһилиэнньэлээх пууннарга куттал суоһаабат, кэлиҥҥи кэмҥэ икки баһаары умулларбыттар.

Мунньах түмүгэр Айсен Николаев “Циклон” АН-26 сөмөлүөт Бүлүү өрүс тардыытыгар сытар улуустарыгар, Горнайга үлэлээн баран салгыы Томпоҕо, Тааттаҕа барыаҕын туһунан эттэ. Ону сэргэ кини баһаарга үлэлии сылдьар дьон аһылыгынан, таҥаһынан, оборудованиенан, техниканан толору хааччыллыахтаахтарын, үбүлээһин боппуруоһа уталытыллыбакка быһаарыллан иһиэхтээҕин бэлиэтээтэ.

Аграфена КУЗЬМИНА, “Саха сирэ” хаһыат.

0
0