Ил Дархан «Газпром» салалтатын кытта мунньахтаата...
Олох-дьаһах

Ил Дархан «Газпром» салалтатын кытта мунньахтаата

Ил Дархан Айсен Николаев бүгүн, балаҕан ыйын 16 күнүгэр, «Газпром» бырабылыанньатын бэрэссэдээтэлин солбуйааччы Виталий Маркелов кыттыылаах мунньаҕы тэрийдэ. Манна эрэгийиэн хампаанньаны кытта үлэтин боппуруостарын ырыттылар.

Мунньах саҕаланыыта Айсен Николаев 2019 сыл ахсынньытыгар Арассыыйа бэрэсидьиэнэ Владимир Путин «Сибиир күүһэ» гаас ситимин арыйбытын, «Газпром» былаанынан Алдан, Ленскэй, Нерюнегри оройуоннара гааска холбонуулара саҕаламмытын, сүүсчэ үлэ миэстэтэ тахсыбытын бэлиэтээн эттэ.

«Бу 2017 сылтан СӨ бырабыыталыстыбатын уонна «»Газпром» бииргэ үлэлээбиттэрин түмүгэ буолар. Тэрилтэ салайааччытыгар Алексей Миллерга, Виталий Маркеловка уонна «Сибиир күүһэ» олоххо киирэригэр үлэлээбит-хамсаабыт, өрөспүүбүлүкэ социальнай-экэнэмиичэскэй сайдыытыгар сабыдыаллаабыт дьоҥҥо махтанабын», — диэн эрэгийиэн баһылыга махтал тылларын эттэ.

Айсен Николаев «Газпром — оҕолорго» диэн социальнай бырагыраама көмөтүнэн Дьокуускайга 2013 сыллаахха «Стерх» успуорт комплекса тутуллубутун санатта. Билиҥҥи кэмҥэ Саха сирэ уонна «Газпром» Дьокуускайга, Алдаҥҥа уонна Чульмаҥҥа успорт эбийиэктэрин тутарга сөбүлэһии түһэрсэн үлэлии сылдьаллар.

Мунньах кэмигэр 2021-2025 сылларга өрөспүүбүлүкэ гааска холбонуутун бырагырааматын боппуруостарын ырыттылар. «Бу бырагыраама олоххо киириитэ биһиги өрөспүүбүлүкэбитигэр улахан суолталаах. Кэлэр сылларга Алдаҥҥа, Ленскэйгэ, Өлүөхүмэҕэ, Нерюнгрига барыта 21 нэһилиэнньэлээх пуун гаастаныаҕа. Алдан, Өлүөхүмэ куораттар, Чульман хочуолунайа гааска холбоннохторуна, манна олорор дьон олохторун хаачыстыбата тупсуо этэ. 2030 сылга диэри бырагыраамаҕа киирбит 30 пуун гаастанара былааннанар. Бүгүҥҥү күҥҥэ «Газпром» өттүттэн бу бырагыраама олоххо киирэригэр үлэ барар, өрөспүүбүлүкэ өттүттэн үбүлээһиҥҥэ эмиэ харчы көрүллүөҕэ. Бу бырагыраама атын бырайыактар курдук хаачыстыбалаахтык уонна болдьоҕор олоххо киириэ диэн эрэнэбин,» — диэн Айсен Николаев эттэ.

«Газпром» бырабылыанньатын бэрэссэдээтэлин солбуйааччы Виталий Маркелов «Сибиир күүһэ» гаас ситимэ олоххо киириэҕиттэн өрөспүүбүлүкэ нэһилиэнньэлээх пууннара гааһынан хааччыллар кыахтаммыттарын эттэ. «Биһиги бу боппуруоска болҕомтобутун уурабыт. Бүгүн ырыппыт бырагыраамабыт «Газпром» уонна өрөспүүбүлүкэ өттүттэн элбэх үбү эрэйэр. Бу бырагыраама 2026-2030 сыллардааҕы былааҥҥа тирэх буолуоҕа. Дойдубут бэрэсидьиэнэ Владимир Путин сорудаҕынан, 2030 сылга Саха сирэ гааска холбонуута түмүктэниэхтээх,» — диэн Маркелов бэлиэтээн эттэ.

СӨ Ил Дарханын уонна бырабыыталыстыбатын пресс-сулууспата.

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

девять − 9 =