Ил Дархан Федерация Сэбиэтигэр муоста тутуутун туруоруста

Бүгүн эбиэттэн киэһэ Москваҕа Ил Дархан Егор Борисов Федерация Сэбиэтин 425-с мунньаҕар регионнарга бэриллэр анал чааска кытынна. Манна кини Саха сирэ – Уһук Илин регионнарга Арктика, хотугу дойду боппуруостарыгар сүрүн миэстэни ылыаҕын туһунан иһитиннэрдэ.

Ил Дархан, бастатан туран, Саха сирин уратытын, инники сайдыытын, стратегиятын билиһиннэрдэ. “Саха сиригэр, сайдыыбыт стратегиятынан, кэнэҕискитин 400 бырайыак үлэлиэхтээх. Бу бырайыакка кырата 50 тыһыынча үлэ миэстэтэ тахсыаҕа. Итинэн биһиги үлэ күүһүн 1,5 төгүл үрдэтиэхпит”, — диэн иһитиннэрдэ.

Салгыы кини улахан бырайыактарга тохтоото. Онно сүрүн миэстэни суол-иис боппуруоһа ыларын бэлиэтээн туран, Өлүөнэ өрүһү туоруур муоста бырайыага тыын суолталааҕын эттэ.

Мунньах буолуон иннинэ Федерация Сэбиэтин бэрэссэдээтэлэ Валентина Матвиенко Ил Дархан Егор Борисовы кытары көрсүбүтэ, Саха сирин күннэригэр анаммыт быыстапкаҕа Өлүөнэ өрүһү туоруур муоста бырайыагын көрбүтэ. Егор Борисов Саха сирин суолун-ииһин туһунан кэпсээн туран, муоста өрөспүүбүлүкэҕэ эрэ буолбакка, Уһук Илин регионнарга ураты суолталааҕын бэлиэтээтэ. Оттон “Россия тимир суоллара” АХ генеральнай дириэктэрэ Василий Шимохин өрүһү туоруур муоста бырайыагын билиһиннэрэригэр, массыына уонна тимир суоллара тэҥҥэ барыахтаахтаахтарын иһитиннэрдэ. Түмүккэ Валентина Ивановна муоста тутуутугар биир инвестор быһыытынан “Россия тимир суоллара” АХ буолуон сөбүн туһунан эттэ.

Бэлиэтээн эттэххэ, бу күннэргэ Москваҕа Саха сирин күннэрэ ыытылла тураллар. Бэҕэһээ, бүгүн Федерация Сэбиэтин сис кэмитиэттэригэр Саха сиригэр туһуламмыт кэпсэтиилэр, көрсүһүүлэр, «төгүрүк остуол» буоллулар. Бүгүн Федерация Сэбиэтин улахан мунньаҕар бу анал күннэринэн Саха сирин дэлэгээссийэтигэр туспа чаас көрдүлэр. Мунньахха Егор Борисовы сэргэ Ил Түмэн спикера Александр Жирков дакылаат оҥордо.

Түмүккэ Валентина Матвиенко Саха сирэ үгүс рейтиҥҥэ бастакы күөҥҥэ тахсыбытын, РФ президенин ыам ыйынааҕы ыйаахтарын толорон иһэрин бэлиэтээн туран,  регион сайдыытыгар туһуламмыт боппуруостарга күүс-көмө буолуоҕун, Сэбиэт бүгүҥҥү мунньаҕын уурааҕар ити барыта киириэҕин туһунан иһитиннэрдэ.

Аграфена КУЗЬМИНА, “Саха сирэ” хаһыат, edersaas.ru.