Ил Дархан Евгений Григорьевы Дьокуускай баһылыга буолбутунан эҕэрдэлээтэ

Дьокуускай баһылыгын быыбара түмүктэннэ, кыайаалаах билиннэ. Киин куорат олохтоохторо «Биир ньыгыл Арассыыйа» баартыйаттан турбут Евгений Григорьевка элбэх куолаһы биэрбиттэр. Кинини кыайыытынан Ил Дархан Айсен Николаев эҕэрдэлээтэ.

«Дьокуускай баһылыгын быыбара түмүктэннэ, куоластар ааҕылыннылар, түмүгү туттубут. Мин Евгений Григорьевы бу дуоһунаска талыллыбытыттан үөрэн туран эҕэрдэлиибин. Бу эппиэтинэстээх дуоһунаһы кыаныа, олохтоохтор тустарыгар элбэҕи оҥоруо диэн эрэнэбин. Ситиһиилэри! Быыбарга кыттыбыт куорат олохтоохторугар махтанабыт», — диэн Ил Дархан Инстаграмҥа баар страницатыгар суруйбут.

Түүн 2:00 чаастааҕын дааннайдарынан, боротокуол 96,72% ааҕыллыбытын кэнниттэн Евгений Григорьев бастаан иһэрэ биллибитэ. Кини туһугар 44,09% быыбардааччы куолаһын биэрбит. Иккис Виталий Обедин — 39,87%, үһүс Савва Михайлов — 11,29%.

edersaas.ru

Хаартыска — Ил Дархан Инстаграмыттан.