“Рейтинг” информационнай коммуникация “Национальнай эриэйтин” федеральнай уопсастыбаннай бырайыак иитинэн, дойду субъегын баһылыктарын үлэлэрин сыаналыырга анаммыт уочараттаах чинчийиитин таһаарда. Мантан көстөрүнэн, СӨ Ил Дархана Айсен Николаев эриэйтинэ үрдээбит.
Ол курдук, эриэйтиҥҥэ 2022 сыл от ыйа-атырдьах ыйа хабыллыбыттар. Эриэйтин бастакы бөлөҕөр Айсен Николаев Сергей Собянин (Москва), Рустам Минниханов (Татарстан Өрөспүүбүлүкэтэ), Алексей Дюмин (Тула уобалаһа), Рамзан Кадыров (Чечня Өрөспүүбүлүкэтэ), Андрей Воробьев (Москва уобалаһа), Александр Дрозденко (Ленинград уобалаһа) кэнниттэн сэттис сылдьар. Испииһэккэ, уопсайа, 25 салайааччы киирбит.
Айсен Николаев “Национальнай эриэйтин” табылыыссатыгар биир үрдэл өрө тахсыбыт. Эриэйтинэ үрдүүрүгэр ааспыт сылы кытта тэҥнээтэххэ ойуур баһаарын намтааһына (былырыын 6 мөл. га, быйыл 520 тыһ. га), Дьааҥыны уонна Кэбээйини уу ылыытыгар ыксаллаах быһыыга чопчу, кэмигэр хамсаныы, өрөспүүбүлүкэ уонна баһылык инновация эйгэтигэр кэскиллээх үлэлэрэ, хааччах кэмигэр эрэгийиэн экэниэмикэтин сайдыыта, Саха сирин салалтата федеральнай уонна норуоттар икки ардыларынааҕы бэбиэскэ үлэтэ (трансформация), ону эрэгийиэн таһымыгар сайыннарыы итиэннэ социальнай-экэнэмиическэй кыһалҕаны быһаарыыга көдьүүстээх, кэскиллээх үлэтэ учуоттаммыт.
Маныаха респонденнарынан араас эйгэттэн араас идэлээх дьон буолбуттар. Бу чинчийиини ыытыы оруннаах буоларыгар суолталаах, ирдэнэр диэн суруйаллар.
Людмила ПОПОВА, “Саха сирэ” хаһыат, edersaas.ru
Хаартыска: СИА.