СӨ Ил Дархана Айсен Николаев бүгүн төрөөбүт күнэ.
Киниэхэ бу кэрэ-бэлиэ күнүгэр аан дойду араас муннуктарыттан эйэҕэс эҕэрдэлэр кэлэллэр. Онтон Ил Дархан үгэс буолбут үлэтин-хамнаһын билиһиннэрэр.
—Мин төрөөбүт күммэр уруккуттан улуустарга, куорат таһыгар сылдьар, дьону-сэргэни кытары көрсүһэр үгэстээхпин. Маннык айаннарга сылдьан, мин Котогоров-Фурсо диэн элбэх оҕолоох олус үчүгэй дьиэ кэргэни кытары билсибитим.
Онтон ыла мин бу таптал уйаламмыт алаһатыгар, эйэлээхтик, олус үчүгэйдик, кыһамньылаахтык иитиллибит уонна сылаас сыһыаҥҥа бигэнэр 25 оҕолоох дьиэ кэргэҥҥэ үөрэ-көтө сылдьабын. Соторутааҕыта социальнай ситиминэн төрөөбүт күммэр өссө төгүл кинилэргэ тиийэ сылдьарым туһунан ыҥырыы туппутум. Онуоха бу Саха сиригэр Ийэ сылынан көрсүһүү ураты бэлиэнэн буолар. Кэнники көрсүһүүбүтүттэн бэттэх оҕолор биллэ улааппыттар. Ким эрэ бэйэтэ номнуо ыал буолбут, туһунан олорор, биэс сиэн улаатан эрэр. Онтон Бэрэсидьиэн буолуон баҕарар мин кырачаан доҕорум Рома, хайыы үйэ 9 сааһа. Кини билигин ыра санаатын ымыы оҥостон сылдьар уонна былааннарын туһунан дьоһуннук туттан олорон кэпсиир. Бу бэртээхэй, истиҥ дьиэ киэргэн соһуччу бэлэх оҥордо — ырыа ыллаатылар, минньигэс туордунан күндүлээтилэр уонна төрөппүттэрбин кытары миигин уруһуйдаабыттарын бэлэхтээтилэр.
Улахан хаһаайыстыбалаах ыал оҕолоро кыраларыттан үлэлии үөрүйэхтэр, төрөппүттэригэр көмө дьоно. Хаһаайыстыбаларыгар сылгылаахтар, понилаахтар, козалаахтар, индейкалаахтар, оннооҕор страус баар! Аксаналаах Андрейы кытта хаһаайыстыбаҕа үлэлэрин-хамнастарын, судаарыстыба оҥорор өйөбүлүн туһунан кэпсэттибит. Хомойуох иһин, бу көмөнөн сорох дьиэ кэргэттэр туһаналлара арыт кыаллыбат. Ыйыллыбыт көмөнү кэмигэр биэрии боппуруоһугар көмөлөһүөх буолан эрэннэрдим.
Маннык дьиэ кэргэттэр көлүөнэ умунааһынын салгыыллар, төрөөбүт өрөспүүбүлүкэбит сайдарыгар, чэлгийэригэр тирэх буолаллар!