Кытайга РФ премьер-миниистирэ Дмитрий Медведев салайааччылаах Арассыыйа делегациятын састаабыгар Ил Дархаммыт Егор Борисов киирэн үлэлээтэ.
edersaas.ru
Кытай норуодунай өрөспүүбүлүкэтигэр оробуочай сырыыга федеральнай миниистирдэри, улахан корпорациялар баһылыктарын кытары икки эрэ субъект баһылыгын ылбыттара.
Егор Борисов Кытайга ыытыллыбыт сүрүн тэрээһиннэргэ барытыгар кытынна. Ол курдук атыы-эргиэн, экономика, инвестиция боппуруостарын таарыйдылар.
РФ Бырабыыталыстыбатын вице-премьерэ Аркадий Дворкович «Сибиир күүһэ» магистральнай гаас ситимигэр туһуламмыт Арассыыйа уонна Кытай эбии сөбүлэһиини түһэрсибиттэрин санатан эттэ. Гааһы хачайдааһын 2019 сылтан саҕаланыахтаах.
Маны таһынан, сөргүтүллэр электроэнергетика, таас чоҕу экспорка таһаарыы, Арктиканы, цифровой экэниэмикэни сайыннарыы уонна да атын боппуруостар тула кэпсэттилэр.
Кытайга сырыы туһунан Егор Борисов: «Үтүө эрэ түмүктэрдээх көрсүһүү буолла. Бииргэ үлэлээһиҥҥэ элбэх сөбүлэһии түһэрсилиннэ. Арассыыйаҕа да, Кытайга да туһааннаах сытыы боппуруостар көтөҕүлүннүлэр. Кытайдар Арассыыйаҕа ытыктабыллаах сыһыаннарын бэлиэтии көрдүм»,— диэн egorborisov.ru сайтка суруйар.
Ил Дархан Егор Борисов Кытайга сырыытын туһунан сиһилии сырдатыахпыт.
Анивера Акимова, “Саха сирэ” хаһыат, edersaas.ru