Ил Дархан Егор Борисов Аан дойду дьахталларын күнүнэн эҕэрдэтэ
Саха Өрөспүүбүлүкэтин салалтатын аатыттан уонна тус бэйэм кулун тутар 8 күнүнэн – Аан дойду дьахталларын күнүнэн итиитик-истиҥник эҕэрдэлиибин!
Саха сирин дьахталлара биһиги тыйыс айылҕалаах хотугу кыраайбыт сайдыытыгар сүҥкэн кылааттарын киллэрэллэр, олох бары эйгэтигэр үтүө сыһыаны олохтууллар, ханнык да идэҕэ, ол иһигэр эппиэтинэстээх дуоһунастарга эмиэ, айымньылаахтык үлэлииллэр, үрдүк чыпчааллары дабайаллар. Кэрэ аҥаардарбыт – учуонайдар уонна педагогтар, быраастар уонна култуура үлэһиттэрэ, спортсменнар уонна тыа сирин туруу үлэһит дьоно, урбаанньыттар, уопсастыбаннай уонна судаарыстыбаннай деятеллэр. Эһиги ситиһиигит биһиги олохпутун тупсарар, үүнэр көлүөнэни үтүөҕэ иитэр, төрөөбүт өрөспүүбүлүкэбит аатын ааттатар.
Ону тэҥэ хас биирдиигит – кыһамньылаах ийэ, кэргэн, эдьиий эбэтэр кыыс оҕо – алаһа дьиэ араҥаччыта. Эһиги сүрүн үлэҕит таһынан дьиэ, хаһаайыстыба күннээҕи түбүгүн бүтэрэ-оһоро охсорго хантан күүс-сэниэ ыларгытын биһиги, эр дьон, сөҕө эрэ саныыбыт.
Өрөспүүбүлүкэ олохтоохторун кэрэ аҥаардарын, саха мааны куоларын таптала уонна өйөбүлэ эр дьону өссө үрдүк дабайыыларга кынаттыыр. Эһиги тускутугар күүстээх аҥаардаргыт кыаллыбаты да кыайаллар, суоҕу да баар гыналлар, хорсун быһыылары оҥороллор!
Үтүө-мааны далбар хотуттарбытыгар кытаанах доруобуйаны, уостубат тапталы уонна дьолу-соргуну баҕарабын! Бырааһынньыгынан!
Саха Өрөспүүбүлүкэтин Ил Дархана Егор Борисов